საქართველოს ტექნიკური უნივერსიტეტი უახლოეს მომავალში დააფიქსირებს პოზიციას სამოქალაქო კოდექსში შესულ ცვლილებებთან დაკავშირებით. "მსგავს საკითხებზე უნივერსიტეტის სახელით პოზიციის დაფიქსირება შედის სტუ-ს აკადემიური საბჭოსა და სენატის კომპეტენციაში. უახლოეს პერიოდში მოიწვევა ფაკულტეტის საბჭოები, ასევე სენატისა და აკადემიური საბჭოს სხდომები, სადაც გაიმართება მსჯელობა, რის შემდგომაც სტუ საჯაროდ დააფიქსირებს თავის პოზიციას", - აცხადებენ სტუ-ში.
შეგახსენებთ, რომ ივანე ჯავახიშვილის სახელობის თბილისის სახელმწიფო უნივერისტეტი და ილიას სახელმწიფო უნივერისტეტი პრეზიდენტს მიმართავენ, ვეტო დაადოს პარლამენტის მიერ 19 აპრილს მიღებულ სამოქალაქო კოდექსში შესულ ცვლილებებს. როგორც გუშინ გამართულ პრესკონფერენციაზე ილიას უნივერსიტეტის რექტორმა, გიგი თევზაძემ განაცხადა, ამ ცვლილებებით უნივერისტეტის ავტონომია იზღუდება. "ამ ცვლილებებით იზღუდება უნივერსიტეტის ავტონომია. ეს ცვლილებები პარლამენტმა 19 აპრილს მესამე მოსმენით მიიღო. ცვლილების მიხედვით, მთავრობას უფლება ეძლევა, უნივერსიტეტისა და მისი საბჭოების უკითხავად შეუცვალონ სახელმწიფო უნივერისიტეტებს იურიდიული ფორმა, ანუ კერძო სამართალის სუბიექტის სტატუსი შეიცვალოს საჯარო სამართლის სუბიექტის სტატუსად. ეს ფაქტი, რომ ამ შესწორებით უნივერსიტეტის ავტონომია იზღუდება იწვევს ჩვენს წუხილს. ამიტომ, პრეზიდენტს თხოვნით მივმართავთ, რომ დაადოს ვეტო ამ ცვლილებებს", - განაცხადა თევზაძემ.
მისი ინფორმაციით, პრეზიდენტს ამ ცვლილებებზე ჯერჯერობით არ აქვს ხელი მოწერილი და ცვლილებები ამოქმედებული არ არის. "ამ შესწორებით პრობლემა შეიძლება შეიქმნას ინტელექტუალურ საკუთრებასთან მიმართებაშიც, ასევე მოძრავ და უძრავ ქონებასთან მიმართებაში. უნივერსიტეტები ქმნიან ქონებასაც, ეს იქნება პატენტები, გამოგონებები და ამ ყველაფრის ხელყოფა მას მერე, რაც უნივერისტეტები გადაკეთდებიან საჯარო სამართლის პირებად იქნება უფრო ადვილი. არ შეიძლება, რომ უნივერისტეტებს მის უკითხავად შეუცვალონ სამართლებრივი სივრცე. თუ პრეზიდენტი ვეტოს დაადებს ამ ცვლილებებს, შესაძლებელი იქნება რომ პარლამენტმა უფრო დაწვრილებით განიხილოს ეს საკითხი", - განაცხადა თევზაძემ. მისი ინფორმაციით, მან ამ საკითხთან დაკავშირებით პარლამენტის თავმჯდომარესთან კონსულტაცია გამართა. "მე მან მითხრა, რომ დამეხმარებოდა მოლაპარაკებებში, თუმცა ფაქტია, რომ სამივე მოსმენით კანონპროექტი მიღებულია", - აღნიშნა თევზაძემ.
საქართველოს განათლებისა და მეცნიერების მინისიტრი გიორგი მარგველაშვილი იმედოვნებს, რომ პრეზიდენტი სამოქალაქო კოდექსში შესულ ცვლილებებს ვეტოს არ დაადებს. როგორც განათლების მინისტრმა ილიას სახელმწიფო უნივერსიტეტისა და თბილისის ივანე ჯავახიშვილის სახელობის სახელმწიფო უნივერსიტეტის რექტორების განცხადების კომენტირებისას აღნიშნა, ეს ცვლილებები თანხვედრაშია საქართველოს ევროპულ ინტეგრაციასთან და ბოლონიის პროცესთან. "მე იმედი მაქვს, რომ პრეზიდენტი, რომელმაც 19 აპრილს ევროპასთან დაახლოების მიტინგი მოაწყო ამ ცვლილებებს ვეტოს არ დაადებს. საქართველოში მუშაობს არასწორად აგებული სისტემა, რომლის ერთ-ერთი ნათელი გამოვლინება არის რეგენტთა ინსტიტუტი, რომელიც იყო აუცილებელი იმ სისტემაში. საქართველოში სახელმწიფო უმაღლესები აბსურდში არიან, ისინი არიან სამთავრობო-არასამთავრობო ორგანიზაციები. ასეთი აბსურდის უფრო ევროპულ ცივილიზებულ ჭრილში გადასაყვანად ვახორციელებთ ამ ცვლილებებს", - განაცხადა მარგველაშვილმა.