7-11 მაისს საქართველოში ევროპის კვირეული გაიმართება. კვირეული 7 მაისს ილია ჭავჭავაძის სახელობის საქართველოს პარლამენტის ეროვნულ ბიბლიოთეკაში გაიხსნება და მასში მონაწილეობას მიიღებენ: სახელმწიფო მინისტრი ევროპულ და ევროატლანტიკურ სტრუქტურებში ინტეგრაციიის საკითხებში ალექსი პეტრიაშვილი, განათლებისა და მეცნიერების მინისტრის მოადგილე დავით ზურაბიშვილი და საქართველოში ევროკავშირის წარმომადგენლობის ხელმძღვანელი ფილიპ დიმიტროვი. ასევე მოეწყობა ესეების, ფოტოებისა და ნახატების კონკურსში გამარჯვებულ ნაშრომთა დაჯილდოება და ფოტოებისა და ნახატების გამოფენა.
ღონისძიებაში მონაწილეობას მიიღებენ ნოვატორები, კონკურსში მონაწილე და გამარჯვებული მოსწავლეები.
კვირეულის ფარგლებში 8 მაისს, დაგეგმილია შეხვედრა თბილისში, მასწავლებელთა პროფესიული განვითარების ეროვნულ ცენტრში თემაზე: საქართველო - ევროკავშირის თანამშრომლობის პერსპექტივები. შეხვედრაში მონაწილეობას ალექსი პეტრიაშვილი, დავით ზურაბიშვილი, თბილისის საჯარო სკოლების დირექტორები და პესტალოცის პროგრამის მონაწილეები მიიღებენ. ასევე გაიმართება შეხვედრა "საქართველოს საზოგადოებრივ საქმეთა ინსტიტუტში" თემაზე - "ევროკავშირში ინტეგრაციის პროცესი - ლატვიური გამოცდილება", სადაც მონაწილეობას ალექსი პეტრიაშვილთან ერთად ლატვიის საგანგებო და სრულუფლებიანი ელჩი საქართველოში ელიტა გაველე მიიღებენ.
10 მაისს, 13:00 საათზე დაგეგმილია შეხვედრა თელავის სახელმწიფო უნივერსიტეტში, რომელშიც მონაწილეობას ალექსი პეტრიაშვილი და ესტონეთის საგანგებო და სრულუფლებიანი ელჩი საქართველოში პრიიტ ტურკი მიიღებენ.
ღონისძიებაზე იგეგმება ფილმის - "ესტონეთის გზა ევროკავშირისკენ" ჩვენება, მოგვიანებით, გაიმართება დისკუსია, 19:30 საათზე კი სახელმწიფო მინისტრ ალექსი პეტრიაშვილის სახელით, სასტუმრო "რედისონ ბლუ ივერიაში" ევროპის დღისადმი მიძღვნილი მიღება გაიმართება.
ევროპის კვირეულის ფარგლებში, 11 მაისს 10:00 საათზე, "ევროპის მოედანზე" ხეების დარგვა იგეგმება. 11:00 საათზე კი "ვარდების მოედნიდან" "ევროპის მოედნამდე" გარბენი მოეწყობა. გამარჯვებულებს პრიზებს გადასცემენ ალექსი პეტრიაშვილი, საქართველოს სპორტისა და ახალგაზრდობის საქმეთა მინისტრი ლევან ყიფიანი და საქართველოში ევროკავშირის წარმომადგენლობის ხელმძღვანელი ფილიპ დიმიტროვი. მოგვიანებით, ევროპის მოედანზე კვირეულის დახურვა იგეგმება.
