2013 წელს სრულიად საქართველოს კათოლიკოს-პატრიარქის ლოცვა-კურთხევით, ყოველ ოჯახში შებრძანდება ივერიის ღვთისმშობლის ხატი, რომელზეც მისი უწმიდესობის მიერ შექმნილი ლოცვაა დატანილი. ხატი ყოველი სახლის მცველად და მფარველად, დაბრძანდება მის კართან. პირველი ხატები 7 მაისს საჩუქრად გადაეცემა მახათას მთაზე შეკრებილ მრევლს.

15 საათიდან მახათას მიმართულებით უფასო ავტობუსები იმოძრავებენ შემდეგი ადგილებიდან: ვარდების მოედანი, გადასასვლელი ხიდი, ვარკეთილის მეტრო

2011 წლის 12 მაისს, ანდრია პირველწოდებულის ხსენების დღეს, მახათას მთაზე, ტაძრის საძირკველი ეკურთხა.

მას შემდეგ უკვე მესამე წელია, ბრწყინვალე შვიდეულის სამშაბათს, ივერიის ღვთისმშობლის ხატის დღესასწაული მახათას მთაზე განსაკუთრებულად აღინიშნება. ტაძარი, რომელსაც მთელი საქართველო ერთად აშენებს, სწორედ ივერიის ღვთისმშობლის ხატის სახელობისაა. ხატის დღესასწაულზე 2012-ში საძირკველი გაიჭრა. წელს, 2013-ში კი საძირკველის ამოყვანა დასრულებულია და მეორე ეტაპის მშენებლობა იწყება!

ისტორიულ მშენებლობაში ათასობით საქართველოს მოქალაქე და უცხოეთში მყოფი ჩვენი თანამემამულეები არიან გაწევრიანებულნი. ტაძრის მშენებელთა გვარ-სახელები იმ სპეციალურ წიგნში განთავსდება, რომელიც ტაძარში დაიდებს ბინას.

ტაძრის მშენებლობის თვალყურის დევნება პირდაპირი ეთერის საშუალებითაც შეიძლება ფონდ "ივერიისას" საიტზე - www.makhata.ge