მიმდინარე საგზაო პროექტების მონიტორინგის მიზნით, საქართველოს რეგიონული განვითარებისა და ინფრასტრუქტურის მინისტრის მოადგილე შოთა მურღულია, საავტომობილო გზების დეპარტამენტის თავმჯდომარე დავით შავლიაშვილი და თავმჯდომარის მოადგილე იოსებ ქადაგიშვილი კობი-გუდაურის გზის სარეაბილიტაციო მონაკვეთზე იმყოფებოდნენ. მათ ადგილზე მოინახულეს 12 კმ-იანი საგზაო მონაკვეთისა და გვირაბების რეაბილიტაციის სამუშაოების მიმდინარეობა.
მცხეთა-სტეფანწმინდა-ლარსის საავტომობილო გზის კობი-გუდაურის (კმ.96-კმ.107) 12 კმ-იანი მონაკვეთის რეაბილიტაციის სამუშაოები ითვალისწინებს გზის სავალი ნაწილის ასფალტ-ბეტონის საფარით მოწყობასა და 5 გვირაბის რეაბილიტაციას.
გვირაბების სარეაბილიტაციო სამუშაოები მოიცავს: ნახევრად დახურული ტიპის - ზვავდამცავი გვირაბების გადახურვას, ჰიდროსაიზოლაციო და სადრენაჟო სისტემების მოწყობას. აღნიშნული ხელოვნური ნაგებობების ზედაპირი გათავისუფლდება ზედმეტი გრუნტისგან, გაიწმინდება კონსტრუქციები და მოეწყობა ჰიდროსაიზოლაციო ტორკრეტ-ბეტონის ფენა.
ასევე, გვირაბების სავალი ნაწილის რეაბილიტაციის ფარგლებში, ხორციელდება გზის ზედა ფენის მოხსნა, რაც გვირაბის შიდა სიმაღლის მოცულობასა და შესაბამისად, მაღალი ავტოტრანსპორტის გამტარუნარიანობას გააუმჯობესებს.
კობი-გუდაურის გზის სარეაბილიტაციო სამუშაოებს ასრულებს შ.პ.ს „სახელმწიფო სამშენებლო კომპანია" ხოლო გვირაბების სარეაბილიტაციო სამუშაოებს - შ.პ.ს „მამისონი".
აღნიშნული ობიექტების რეაბილიტაცია 2013 წლის დეკემბრამდე დასრულდება.