,,"დიალოგი" რადიოში, მაღალი ალბათობით, ვერ გადავა", -აცხადებს ჟურნალისტი დავით პიჭაძე გავრცელებული ინფორმაციის საპასუხოდ, რომლის მიხედვითაც შესაძლოა დავით პაიჭაძის გადაცემები მხოლოდ რადიოში დარჩეს, ხოლო ეკა კვესიტაძის "აქცენტები" დაიხუროს.
დავით პაიჭაძის განმარტებით, გადაცემა ,,დიალოგი" ოთხშაბათს, 1 მაისს საზოგადოებრივი მაუწყებლის ეთერში გავა.
"ჩემი გადაცემა "დიალოგი" რადიოში მაღალი ალბათობით ვერ გადავა, რადგან რადიოში ისედაც მაქვს პირდაპირი ეთერი კვირაში ხუთჯერ ("პიკის საათი", FM 102.4, 17 საათსა და 10 წუთზე, ყოველდღე, შაბათ-კვირის გარდა). ვერანაირ რაციონალურ საფუძველს, კიდევ დავემატო საზოგადოებრივი რადიოს ეთერს, ვერ ვხედავ. მსუბუქად გამკვირვებია, რომ ჩემი რადიოჟურნალისტობის ამბავი (მთლიანი სტაჟი 17 წელი, აქედან 10 წელი რადიო თავისუფლებაში, 7 - საზოგადოებრივ რადიოში) ბატონი თამაზ ტყემელაძისთვის, ჩანს, უცნობია.გადაწყვეტილებებს საზოგადოებრივ მაუწყებელში იღებს მისი გენერალური დირექტორი გიორგი ბარათაშვილი; გიორგი ბარათაშვილს ასეთი შინაარსის განცხადება - ამ ორი გადაცემის დახურვაზე, გადატანაზე ან შეკვეცაზე - არ გაუკეთებია.ჩემთან კომუნიკაცია ძალიან ადვილია და მიმაჩნია, რომ მაუწყებლის ნებისმიერ თანამშრომელს არ აქვს პრობლემა, როცა უნდა და რაც უნდა, ის მითხრას. კიდევ ერთხელ მსუბუქად გამკვირვებია, ჩემთან დაკავშირებული ინფორმაციის შესატყობინებლად საზოგადოებრივი მაუწყებლის თანამშრომელმა რატომ უნდა მოუხმოს სხვა მედია საშუალება."დიალოგის" უახლოესი გადაცემები ეთერში გავა, ოთხშაბათს, 1 მაისს, ხუთშაბათს, 2 მაისს და ორშაბათს, 6 მაისს. კოლეგიალური ამბორით,დავით პაიჭაძე" - აცხადებს პაიჭაძე.
შეგახსენებთ, რომ გავრცელებული ინფორმაციით, საზოგადოებრივ მაუწყებელზე რეორგანიზაციის პროცესი მიმდინარეობს, რომლის თანახმად, შესაძლოა დავით პაიჭაძის გადაცემები მხოლოდ რადიოში დარჩეს, ხოლო ეკა კვესიტაძის "აქცენტები" დაიხუროს.