ჯანმრთელობის დაცვისა და სოციალურ საკითხთა კომიტეტის სხდომაზე ჯანმრთელობის დაზღვევის მედიაციის 2012 წლისა და 2013 წლის პირველი კვარტლის ანგარიში სამსახურის უფროსმა, სოფიო ლებანიძემ წარმოადგინა.
როგორც შეხვედრაზე აღინიშნა, მედიაციის სამსახური არის სამედიცინო დავების განხილვის ორგანო, რომელიც ახორციელებს დაზღვეული მოქალაქის უფლებების, კერძოდ, პაციენტის უფლებების დაცვას,ასევე სამედიცინო დაწესებულებებსა და სადაზღვევო კომპანიებს შორის ურთიერთობების მოწესრიგებას. მისი ძირითადი ფუნქციებია: სამოქალაქო დავების განხილვა, დავების რეგულირება, მედიაცია, სამართლებრივი უზრუნველყოფა, სატელეფონო მომსახურება, სტატისტიკა და ანალიზი, მონიტორინგი და ადმინისტრაციული საკითხები. სოფიო ლებანიძის განმარტებით, სამედიცინო მედიაციის სამსახურის პრინციპებია: კონფიდენციალობა, დამოუკიდებლობა და დავის განხილვა.
პრეზენტაციაზე აღინიშნა, რომ მედიაციის სამსახურს აქვს სატელეფონო მომსახურება - ცხელი ხაზი, რომლითაც სარგებლობს მოსახლეობის უმეტესი ნაწილი და მომხმარებელთა ყველაზე მეტი პროცენტული მაჩვენებელი ქ. თბილისის მოსახლეობაზე მოდის.
სოფიო ლებანიძის განმარტებით, 31 იანვრის სტატისტიკური მონაცემებით, სულ 6536 მომართვა შემოვიდა როგორც ფიზიკური პირის, ასევე სამედიცინო დაწესებულებების და სადაზღვევო კომპანიების მხრიდან. მედიაციის სამსახურის მიერ განხილულია 11 ათასამდე საქმე. აქედან, დავების უმეტესობა არის დადებითად გადაწყვეტილი. რაც შეეხება მომართვების განაცხადის ტიპებს, მომართვების 66% საინფორმაციო კითხვებზე მოდის, ხოლო 34% - არასაინფორმაციო კითხვებს მოიცავს. შეხვედრაზე აღინიშნა, რომ ადრესატების მიხედვით 98% სადაზღვევო კომპანიებზე, ხოლო 2% - სამედიცინო დაწესებულებებზე გადანაწილდა.
სახელმწიფო სადაზღვევო პროგრამების ფარგლებში დაფიქსირებული განაცხადების პროცენტული შეფარდება მოსახლეობის რაოდენობასთან, სადაზღვევო კომპანიების მიხედვით, შემდეგნაირად გადანაწილდა: „სადაზღვევო კომპანია ჯი პი აი ჰოლდინგი" 0,13%, დაზღვევის საერთაშორისო კომპანია „ირაო" - 0,16%, საერთაშორისო სადაზღვევო კომპანია „იმედი L international" - 0,10%, , სამედიცინო დაზღვევის ჯგუფი „არქიმედეს გლობალ ჯორჯია" - 0,26%, „სადაზღვევო კომპანია ალფა" - 0,45%, სადაზღვევო კომპანია „ალდაგი ბისიაი" - 0,22%, სადაზღვევო კომპანია „აი სი ჯგუფი" - 0,10%.