გელათის მონასტრის მთავარი - ღვთისმშობლის შობის ტაძრის კედლის მხატვრობა უნიკალურია, იმდენად რამდენადაც აქ ქართული საეკლესიო მხატვრობის თითქმის მთელი ისტორია, მისი განვითარების ყველა მნიშვნელოვანი ეტაპია წარმოდგენილი; მათ შორისაა სამხრეთ კარიბჭის და წმ. მარინეს ეკვდერის კედლის მხატვრობაც, რომელიც სხვადასხვა პერიოდს მიეკუთვნება. სამხრეთის კარიბჭის ფრაგმენტულად შემორჩენილი მოხატულობა 1360-1395 წლებს მიეკუთვნება და პალეოლოგოსური სტილის განვითარების გვიან საფეხურს ასახავს.
წმ. მარინეს ეკვდერის XV-XVI საუკუნის მოხატულობა გვიანი შუასაუკუნეების საქართველოში გავრცელებული ე.წ. ხალხური ნაკადის მოხატულობების ერთ-ერთი თვალსაჩინო ნიმუშია.

ამერიკის ელჩის ფონდის პროექტის ფარგლებში ფრესკებზე ჩატარდა გადაუდებელი პრევენციული კონსერვაცია, მოხატულობის ბათქაშისა და ფერწერული ფენის დაზიანებების აღმოფხვრა; კერძოდ, მოხდა კედლიდან მოშორებული მოხატულობის ბათქაშის ადგილების გამაგრება; წინა სარესტავრაციო ჩარევისას შევსებებსა და ქიმებზე გამოყენებული ცემენტისა და თაბაშირის მოხსნა და კირით შეცვლა; მხატვრობის გაწმენდა მარილებისგან _ ხსნადი მარილების მოშორება; ბათქაშზე არსებული წვრილი ბზარების ინექტირება; მოხატულობის აქერცლილი - დაფხვიერებული ფერწერული ფენის გამაგრება.

ფრესკებზე საკონსერვაციო სამუშაოებს წინ უსწრებდა არქიტექტურის გადაუდებელი სარეაბილიტაციო სამუშაოები; კერძოდ, გამოიცვალა და შეკეთდა ეკვდერის გადახურვა, საიდანაც სათავსოში ჩაედინებოდა წვიმის წყალი, ცემენტის იატაკი შეიცვლა კირით, ჩაისვა სარკმლები.

ხელოვნების საერთაშორისო ცენტრი არის კულტურული მემკვიდრეობის დაცვის სფეროში არსებული არასამთავრობო ორგანიზაცია, რომელსაც საქმიანობის 15 წლის გამოცდილება აქვს. ცენტრი ძირითადად ახორციელებს საერთაშორისო პროექტებს ისეთ დონორ ორგანიზაციებთან თანამშრომლობით როგორიცაა მსოფლიო მონუმენტების ფონდი, პოლ გეტის ფონდი, პრინც კლაუსუს ფონდი და სხვა. ცენტრის მიერ განხორციელებულმა პროექტმა "ტიმოთესუბნის ტაძრის ფრესკების კონსერვაცია" 2006 წელს მიიღო ევროკომისიის "ევროპა ნოსტრას" ევროპული კულტურული მემკვიდრეობის პრიზი.

2008 წელს ხელოვნების საერთაშორისო ცენტრის ნომინაციით გელათის მონასტერი შევიდა მსოფლიო მონუმენტების ფონდის (World Monuments Watch-is) 100 ძეგლის სიაში.

მიმდინარე პროექტი არის აშშ ელჩის კულტურული მემკვიდრეობის დაცვის ფონდის მეორე პროექტი, რომელსაც ცენტრი გელათის ღვთისშობლის ფრესკებზე ახორციელებს. 2004 წელს აშშ ელჩის კულტურული მემკვიდრეობის დაცვის ფონდის დაფინანსებით განხორციელდა გელათის მონასტრის ღვთისმშობლის ტაძრის ნართექსისა და ეკვდერების ფრესკების (XII-XVIII სს.) დიაგნოსტიკური კვლევა და პირველი რიგის საკონსერვაციო სამუშაოების დაგეგმვა".