კოტე კუბლაშვილი თეა წულუკიანის განცხადებას სასამართლო ხელისუფლებაში ჩარევის მცდელობად აფასებს. როგორც უზენაესი სასამართლოს თავმჯდომარემ იუსტიციის მინისტრის განცხადების კომენტირებისას აღნიშნა, მოსამართლეებს არავის შეგულიანება არ სჭირდებათ.
,,ახლა თუ ვინმე კანდიდატურას წამოაყენებს, ამის უფლება აქვს, მაგრამ ეს არაფერს ნიშნავს, თუ კონფერენციაზე არ წამოაყენა თავისი კანდიდატურა, მხოლოდ მაშინ შეიძლება ჩაითვალოს ოფიციალურ კანდიდატურად, შემდეგ შევა საარჩევნო ბიულეტენში და ეყრება კენჭი. ამიტომ ასეთი განცხადებები, ერთი კუთხით ვიღაცამ შეიძლება დაინახოს კონფერენციის მხარდაჭერად, თუმცა, ჩემი აზრით, საჯარო პოლიტიკური პირების მხრიდან ასეთი განცხადებები არის კიდევ ერთი ნაბიჯი ჩარევისა, რათა მოსამართლეებს რაღაც უთხრან. არავის სჭირდება ამის შეხსნება", _განაცხადა კუბლაშვილმა და აღნიშნა, რომ იუსტიციის უმაღლესი საბჭოს არჩევნები ღიად და გამჭვირვალედ უნდა ჩატარდეს, ყოველგვარი ჩარევის გარეშე.
შეგახსენებთ, რომ თეა წულუკიანი მოსამართლეებს მოუწოდებს, იუსტიციის საბჭოს წევრობის კანდიდატურები წარადგინონ და საარჩევნო კამპანია დაიწყონ. როგორც იუსტიციის მინისტრმა "მეცხრე არხის" ეთერში განაცხადა, მოსამართლეებს აქვთ კარგი შესაძლებლობა, ერთის მხრივ, მათი პროფესიული ცხოვრების განვითარებისთვის მნიშვნელოვანი ნაბიჯი გადადგან, ხოლო მეორე მხრივ, - ხელი შეუწყონ დემოკრატიული ცვლილებების განხორციელებას, რომელიც თავისუფალი მართლმსაჯულების სისტემის ჩამოყალიბებას ხელს შეუწყობს. იუსტიციის მინისტრი უზენაესი სასამართლოს თავმჯდომარე კონსტანტინე კუბლაშვილის მიერ მოსამართლეებთან არაგეგმიურად გამართულ შეხვედრებსაც გამოეხმაურა და აღნიშნა, რომ ისინი უნდა დაირაზმონ დემოკრატიული სასამართლო რეფორმის და არა მათი ხელმძღვანელის გარშემო.
თეა წულუკიანმა კიდევ ერთხელ აღნიშნა, რომ იუსტიციის საბჭოს მოქმედი მოსამართლე წევრების არჩევა არადემოკრატიულად მოხდა. შესაბამისად, მათ უფლებამოსილება აუცილებლად შეუჩერდებათ და საბჭოს წევრებს ახალი წესით აირჩევენ, რომელიც ვენეციის კომისიამ, ასევე, სამართლის საერთაშორისო ექსპერტებმა, ქართულმა არასამთავრობო ორგანიზაციებმა და თავად კონსტანტინე კუბლაშვილმაც დემოკრატიულად მიიჩნიეს.
ახალი წესით არჩევის პროცესში მონაწილეობა მოქმედ წევრებსაც ხელახლა შეეძლებათ.
მასალის გამოყენების პირობები
