დევნილ მოსახლეობას „აფხაზეთის იძულებით გადაადგილებულ პირთა ზუგდიდის პოლიკლინიკა" შეღავათებით მოემსახურება. აღნიშნულთან დაკავშირებით, იძულებით გადაადგილებულ პირთა, განსახლებისა და ლტოლვილთა სამინისტრომ პოლიკლინიკასთან თანამშრომლობის მემორანდუმი გააფორმა.
შეთანხმების მიხედვით, პოლიკლინიკა იღებს ვალდებულებას, სამედიცინო მომსახურებისთვის იძულებით გადაადგილებულ პირებს მინიმალური ფასი შესთავაზოს. საუბარია სხვადასხვა სახის სამედიცინო მომსახურებაზე 20%-დან 50-%-იან ფასადკლებაზე.
ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს მხრიდან მემორანდუმს ხელი მინისტრის პირველმა მოადგილემ - გოგი ფაცაციამ მოაწერა, კლინიკის მხრიდან კი პოლიკლინიკის დირექტორმა თამაზ ჯანაშიამ. როგორც გოგი ფაცაციამ აღნიშნა, დევნილი მოსახლეობს ერთ-ერთი საჭიროება სამედიცინო მომსახურების ხელმისაწვდომობაა. აქედან გამომდინარე, აღნიშნული შეთანხმება იძულებით გადაადგილებული მოსახლეობისთვის გარკვეული დახმარება იქნება.
პოლიკლინიკის ხელმძღვანელის - თამაზ ჯანაშის თქმით კი შეღავათებით გალის რაიონში მცხოვრები მოსახლეობაც ისარგებლებს: „ჩვენი შეთანხმების მთავარი მიზანია, არცერთი დევნილი პაციენტი უყურადღებოდ არ დავტოვოთ. მომსახურებით ისარგებლებს გალის რაიონში მაცხოვრებელი მოსახლეობაც, რომელთაც სამედიცინო დაზღვევა არ გააჩნია. მემორანდუმით გათვალისწინებული მომსახურება იმ დანაკლისსაც შეავსებს, რასაც სადაზღეო პაკეტი არ ითვალისწინებს.
