,,კახეთის საინფორმაციო ცენტრის" ინფორმაციით, დედოფლისწყაროში, საქართველო - აზერბაიჯანის საზღვართან, სოფელ საბათლოს მონაკვეთზე სასაზღვრო პოლიციის თანამშრომელი, 30 წლის მამაკაცი მდინარე ალაზანმა წაიღო.
როგორც კახეთის სამაშველო სამსახურის უფროსის მოვალეობის შემსრულებელმა შოთა უტიაშვილმა კახეთის საინფორმაციო ცენტრს განუცხადა, შემთხვევა, 23 აპრილს, დაახლოებით 19:00 საათზე მოხდა. მამაკაცს სამსახურებრივი მოვალეობის შესრულების დროს ფეხი დაუცდა და მდინარეში ჩავარდა.
„გუშინ, საღამოს, სასაზღვრო პოლიციის 2 თანამშრომელი ახორციელებდა შემოვლას, რა დროსაც ერთ მათგანს ფეხი დაუცდა, მდინარეში ჩავარდა და წყალმა წაიღო. შეტყობინება მალევე შევიდა შს საგანგებო სიტუაციების დეპარტამენტში, საძიებო ღონისძიებებში კახეთის სამაშველო სამსახურიც ჩაერთო, მაგრამ ცხედრის პოვნა ჯერ ვერ მოხერხდა. ძიება მიმდინარეობს როგორც წყლის ქვეშ, ასევე ნავებით, მდინარის ზედაპირზე," - განუცხადა კახეთის საინფორმაციო ცენტრს შოთა უტიაშვილმა.
მასალის გამოყენების პირობები