ქუთაისში, ავტოქარხნის ტერიტორიაზე კიდევ ერთი საწყობი აღმოჩნდა, სადაც დევნილი მოსახლეობისთვის დასარიგებელი ინვენტარი ინახებოდა. აღნიშნული საწყობი ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ დათვალიერა და აღნიშნა, რომ ის ინვენტარი, რაც დევნილი მოსახლეობისთვბის იყო ნაყიდი, დევნილებს დაურიგდებათ. ქუთაისში, ავტოქარხნის დასახლებაში აღნოჩენილი საწყობი ამჯერად დალუქულია.
რაც შეეხება ინვენტარს, საწყობში ინახებოდა მაცივრები, სკამები, მაგიდები, სამუშაო იარაღები, სამზარეულოს ნიჟარები, სამზარეულოს კარადები, ტაფები, დანა-ჩანდლები, ჩაი და სხვა ინვენტარი. მსგავსი საწყობები დევნილთა სამინისტრომ თბილისსა და გორშიც აღმოაჩინა. საუბარია თბილისში 5 საწყობზე, გორში კი ერთზე. თბილისში აღმოჩენილ საწყობებში ტექნიკასა და საოჯახო ინვენტართან ერთად გაფუჭებული საკვები პროდუქტებიც ინახებოდა.
როგორც მინისტრმა დავით დარახველიძემ აღნიშნა, აღნიშნული ინვენტარი დევნილებს წლების წინ უნდა მიეღოთ: „დაახლოებით თვენახევრის წინ მსგავსი საწყობი აღმოვაჩინეთ გორში, სადაც დევნილებისთვის განკუთვნილი, 2008 წლის ბიუჯეტის სახსრებით შეძენილი ინვენტარი ინახება. მსგავსი საწყობები გავხსენით თბილისშიც. დევნილებთან ინტენსიური შეხვედრებისას, ისინი სწორედ იმ ნივთებსა თუ ინვენტარს გვთხოვენ, რაც ამ საწყობებში წლებია ინახება. საკმაოდ ბევრი კითხვა და ეჭვი არსებობს, რატომ არ ურიგდებოდა აღმოჩენილი ინვენტარი დევნილებს, რატომ ინახებოდა ის საწყობებში და სად წაიღეს ბიუჯეტის ფულით ნაყიდი სხვა ინვენტარი, რომელიც საწყობიდან გატანილია. ჩვენ ამ საწყობებიდან ვარგისი ინვენტარი ფოთსა და ზუგდიდში გავიგზავნეთ დევნილებს და ამ ინვენტარისთვის ისინი მადლობებს იხდიან. არადა, სამადლობელი არაფერია, ეს სწორედ მათთვის იყო განკუთვნილი. ბუნებრივია, რომ დევნილები უკმაყოფილებას გამოხატავენ იმის გამო, რომ ინვენტარის და სურსათის საკმაოდ დიდი ნაწილი გაფუჭდა და დამნაშავე პირების დასჯას ითხოვენ."
დავით დარახველიძემ ასევე აღნიშნა, რომ ამ საკითხთან დაკავშირებით გამოძიება დაწყებულია და არსებუოლ კითხვებზე პასუხები გამოძიების დასრულების შემდეგ გახდება ცნობილი. რაც შეეხება დასაწყობებულ ინვენტარს, მინისტრმა კიდევ ერთხელ აღნიშნა, რომ საწყობში აღმოჩენილი ნივთები, საჭიროების მიხედვით, დევნილ მოსახლეობას გადაეცემა.