იურიდიულ საკითხთა კომიტეტმა მეორე მოსმენისთვის განიხილა პარლამენტის წევრის, კობა დავითაშვილის მიერ საკანონმდებლო ინიციატივის წესით წარმოდგენილი კანონპროექტი „პროკურატურის შესახებ" კანონში ცვლილების შეტანის თაობაზე" და მისი თანმდევი ათზე მეტი კანონპროექტი.
„პროკურატურის შესახებ" კანონში ცვლილების შეტანის თაობაზე" კანონპროექტის მიხედვით, იუსტიციის მინისტრის მიერ დამტკიცებული სისხლის სამართლის პოლიტიკის სახელმძღვანელო პრინციპები ნაცვლად კონფიდენციალურისა საჯარო იქნება. ცვლილებების თანახმად, იუსტიციის მინისტრისა და მთავარი პროკურორის უფლებამოსილებები ერთმანეთისგან იმიჯნება.
მთავარ პროკურორს იუსტიციის მინისტრის წარდგინებით თანამდებობაზე დანიშნავს და თანამდებობიდან გაათავისუფლებს საქართველოს პრეზიდენტი. უქმდება მთავარი პროკურორის პირველი მოადგილის თანამდებობა. მთავარ პროკურორს ეყოლება მოადგილეები, რომელთა თანამდებობაზე დანიშნაც და თანამდებობიდან გათავისუფლებაც მთავარი პროკურორის პრეროგატივა იქნება. ერთ-ერთი ძირითადი შენიშვნა, რომელიც საკომიტეტო განხილვის დროს დეპუტატების მიერ გამოითქვა პროკურატურის საქმიანობაზე საპარლამენტო კონტროლის საკითხს შეეხებოდა.
მათი აზრით, წარმოდგენილი კანონპროექტი ვერ უზრუნველყოფდა პროკურატურაზე საპარლამენტო კონტროლის განხორციელებას. სხდომაზე გამოთქმული შენიშვნების შემდეგ კომიტეტის წევრები და კანონპროექტის ინიციატორი შეთანხმდნენ, რომ პროექტში შესწორება შევა. კერძოდ, მთავარი პროკურორი პარლამენტის მოთხოვნით ან პირადი სურვილის შემთხვევაში პარლამენტის წინაშე წარსდგება ინფორმაციით, რომელიც არ უნდა შეიცავდეს სისხლის სამართლის საქმის წარმოებასთან დაკავშირებულ საკითხების.
კომიტეტის წევრების შეფასებით, არსებული საკონსტიტუციო მოდელის პირობებში აღნიშნული ჩანაწერის გაკეთება ყველაზე ოპტიმალური ვარიანტია. იურიდიულ საკითხთა კომიტეტმა გამოთქმული შენიშვნების გათვალისწინებით მხარი დაუჭირა „პროკურატურის შესახებ" კანონში ცვლილების შეტანის თაობაზე" კანონპროექტის პლენარულ სხდომაზე გატანას.
ამავე დროს, იურიდიულ საკითხთა კომიტეტმა პირველი მოსმენისთვის განიხილა პროექტი, რომლის თანახმად, იმ შემთხვევაში, თუ საკონსტიტუციო სასამართლო საბოლოო გადაწყვეტილების მიღებამდე შეაჩერებს სადავო აქტის ან მისი სათანადო ნაწილის მოქმედებას, საბოლოო გადაწყვეტილება მან სადავო აქტის ან მის სათანადო ნაწილის მოქმედების შეჩერებიდან 30 კალენდარული დღის ვადაში უნდა მიიღოს. წინააღმდეგ შემთხვევაში, სადავო აქტის ან მისი სათანადო ნაწილის მოქმედების შეჩერების გადაწყვეტილება ძალას კარგავს მისი მიღებიდან 31-ე კალენდარულ დღეს. კანონპროექტის ინიციატორის, პარლამენტის წევრის, ვახტანგ ხმალაძის განმარტებით ცვლილების მიზანია უზრუნველყოს როგორც მოდავის, ასევე მესამე პირთა ინტერესების მაქსიმალური დაცვა. კომიტეტის წევრებმა მხარი დაუჭირეს პროექტის პლენარულ სხდომაზე გატანას.
იურიდიულ საკითხთა კომიტეტმა ასევე მესამე მოსმენისთვის განიხილა კანონპროექტი „საქართველოს სისხლის სამართლის კოდექსში ცვლილების შეტანის შესახებ". საქართველოს მთავრობის საკანონმდებლო ინიციატივის თანახმად, დანაშაულთა ერთობლიობის დროს საბოლოო სასჯელის დანიშვნისას უფრო მკაცრი სასჯელი შთანთქავს ნაკლებად მკაცრს. დანაშაულის რეციდივის შემთხვევაში, საბოლოო სასჯელის დანიშვნისას უფრო მკაცრი სასჯელი შთანთქავს ნაკლებად მკაცრს ან ნაწილობრივ ან მთლიანდ შეიკრიბება ამ დანაშუალთათვის განსაზღვრული სასჯელები. ამასთან, რეციდივის დროს დანიშნული საბოლოო სასჯელის ვადა არ უნდა აღემატებოდეს 30 წელს. კანონში შესატან ცვლილებებს ექნებათ უკუძალა იმ მსჯავრდებულის მიმართ, რომელსაც დანაშაულთა/განაჩენთა ერთობლიობისას საბოლოო სასჯელი დაენიშნა აღნიშნული ცვლილების ამოქმედებამდე არსებული რედაქციის შესაბამისად. კომიტეტმა მხარი დაუჭირა პროექტის პლენარულ სხდომაზე გატანას.
