საქართველოს ტექნიკურ უნივერსიტეტს, კერძოდ სამთო ელექტრომექანიკის სამეცნიერო კვლევით ლაბორატორიას, პენტაგონის მიერ დაფინანსებული პროექტის ("P-549") ფარგლებში, სტუმრად ეწვევა ბრუკჰავენის (აშშ) ნაციონალური ლაბორატორიის მონიტორინგის ჯგუფი. გუშინ ჯგუფის წევრებმა სამთო ელექტრომექანიკის სამეცნიერო კვლევით ლაბორატორიაში სამუშაო შეხვედრა გამართეს, დღეს კი სტუ-ის ადმინისტრაციულ კოპრუსში, მესამე სართულზე, შეხვედრების ოთახში, ჩატარდა პროექტის პრეზენტაცია.
აშშ-ის ენერგეტიკის სამინისტროს საპარტნიორო სამეცნიერო პროექტების წამყვანის,ბრუკჰავენის ნაციონალური ლაბორატორიის წარმომადგენლის, ვასილ ჯორჯაძის განცხადებით, ლაბორატორიის საქმიანობა მიმართულია იქით, რომ ყოფილი სსრკ-ის მეცნიერების მუშაობა, რომლებიც დაკავებული იყვნენ მასობრივი განადგურების იარაღის შექმნით, ახლა მშვიდობიანი პროექტების შექმნისკენ მიიმართოს. "ბუნებრივია, მათ შორისაა საქართველოც და ამჟამად მიმდინარეობს მუშაობა ფიზიკის ინსტიტუტისა და საქართველოს ტექნიკური უნივერსიტეტის მეცნიერებთან", - განაცხადა მან.
ორწლიანი პროექტი საქართველოს ტექნიკური უნივერსიტეტის სამთო ელექტრომექანიკის სამეცნიერო კვლევით ლაბორატორიაში მუშავდება. ლაბორატორიის წარმომადგენელთა განცხადებით, ეს არის საპარტნიორო კომერციული პროექტი, რომელიც საქართველოში პირველად დაფინანსდა.
პროექტის ფარგლებში, საქართველოში ჩამოვიდნენ ექსპერტები: აშშ-ის ენერგეტიკის სამინისტროს საპარტნიორო სამეცნიერო პროექტების წამყვანი (ბრუკჰავენის ნაციონალური ლაბორატორია) ვასილ ჯორჯაძე; აშშ-ს ენერგეტიკის სამინისტროს საპარტნიორო სამეცნიერო პროექტების პროგრამის ხელმძღვანელი (ბრუკჰავენის ნაციონალური ლაბორატორია) როჰატგი უპენდრა; აშშ-ის ენერგეტიკის სამინისტროს საპარტნიორო სამეცნიერო პროექტების წამყვანი დონალდ ლესერი (ლოურენც ლივერმოლის ნაციონალური ლაბორატორია); აშშ-ის ენერგეტიკის სამინისტროს საპარტნიორო სამეცნიერო პროექტების წამყვანი ბილ ფრიმანი (ქ. კანზასის საწარმოო გაერთიანება); აშშ-ის ენერგეტიკის სამინისტროს საპარტნიორო სამეცნიერო პროგრმის პარტნიორი აშოტ ტუმაგიანი (ტექნოლოგიების ტრანსფერის კომპანიის ხელმძღვანელი); აშშ-ის ენერგეტიკის სამიპნისტროს საპარტნიორო სამეცნიერო პროგრამის პარტნიორი ორგანიზაციის, "Energytech"-ის ხელმძღვანელი იგორ ბარსუკოვი.
