საქართველოში არსებული თორმეტივე იუსტიციის სახლი, გასული კვირის განმავლობაში 63 500 მომხმარებელს მოემსახურა. ნაკადების განსაკუთრებული მატება კი, თბილისთან ერთად, ბათუმისა და გორის იუსტიციის სახლებშიც დაფიქსირდა.
იუსტიციის სახლის საზოგადოებასთან ურთიერთობის სამსახურის ინფორმაციით, 8-12 აპრილის შუალედში, მხოლოდ თბილისის იუსტიციის სახლში მომსახურება 43 174-მა მომხმარებელმა მიიღო.
იუსტიციის სახლის ხარისხის მართვის სამსახურის მონაცემებით, საქართველოს იუსტიციის სახლები დღეში, საშუალოდ, 15 875 ათას მომხმარებელს ემსახურებოდა, ლოდინის დროის საშუალო მაჩვენებელი კი 5 წუთს არ აღემატებოდა.
"8-12 აპრილის კვირაში იუსტიციის სახლებში დღეში საშუალოდ 15 875 მომხმარებელი მოდიოდა, ჯამში კი, კვირის განმავლობაში, იუსტიციის სახლები 63 500 მომხმარებელს მოემსახურა. მომხმარებელთა 81 % -ს სასურველი სერვისის მისაღებად 5 წუთზე ნაკლები ლოდინი მოუწია. იმის გათვალისწინებით, რომ 9 აპრილი უქმე დღე იყო და იუსტიციის სახლის ფილიალები სამშაბათს არ მუშაობდა, შემდგომ დღეებში მომხმარებლის ნაკადებმა საგრძნობლად მოიმატა. ნაკადების განსაკუთრებული მატება დაფიქსირდა თბილისის, ბათუმის და გორის იუსტიციის სახლებში,"- აცხადებს იუსტიციის სახლის ხარისხის მართვის სამსახურის უფროსი ნატალია გაბინაშვილი.
