მარნეულის რაიონის სოფელ ახკერპიდან დამწვრობის ცენტრში მოთავსებული 10 წლის ბავშვის ჯანმრთელობის მდგომარეობა ამ ეტაპზე დამაკმაყოფილებელია. როგორც დამწვრობის ცენტრის ექიმმა გუგა ქაშიბაძემ აღნიშნა, მოზარდი კლინიკაში კოჯრის ბავშვთა სახლიდან გადაიყვანეს.
მისი თქმით, ბავშვთა სახლში მოხვედრისთანავე, მოზარდს ტანსაცმელს უცვლიდნენ, რა დროსაც მას ზურგის არეში დამწვრობის კვალი აღმოუჩინეს.
"დამწვრობა არის სავარაუდოდ, თვე-თვენახევრის წინ მიღებული. დღეს მას გაუკეთდა ოპერაცია. ამოკვეთილი იქნა მკვდარი ქსოვილი და მოხდა კანის გადანერგვა. ახლა მის ჯანმრთელობას და სიცოცხლეს საფრთხე არ ემუქრება", - განაცხადა ქაშიბაძემ.
მისი თქმით, პაციენტს რეფლექსურ დონეზე აქვს შენარჩუნებული მოქმედებები - არ მეტყველებს და სიარული უჭირს. სოფელ ახკერპში მცხოვრები 9-შვილიანი ოჯახის შვიდი ბავშვი სოციალურმა აგენტებმა მიმღებ ოჯახებში გადაანაწილეს. დანარჩენი 2 კი, ჯანმრთელობის მძიმე მდგომარეობის გამო, საავადმყოფოებშია გადაყვანილი.
ოჯახისთვის შვილების ჩამორთმევის მიზეზი უმძიმესი სოციალური პირობები გახდა.
სოციალური მომსახურების სააგენტოს ინფორმაციით, ბავშვებს არ აქვთ დაბადების მოწმობები და მშობლებმა ბავშვების ზუსტი ასაკი არ იციან.
