ერთი წლის გოგიტა აბაშიძის გარდაცვალების ფაქტზე პასუხისმგებლობა სოფლის ექიმს დაეკისრა და 4 თვით ლიცენზია შეუჩერდა. როგორც ჯანდაცვის მინისტრმა დავით სერგეენკომ დღეს გამართულ ბრიფინგზე აღნიშნა, ხელვაჩაურის რაიონის სოფელ მახოში გოგიტა აბაშიძის გარდაცვალების ფაქტი ჯანდაცვის სისტემაში არსებულ პრობლემას უკავშირდება.
მისი თქმით, გოგიტა აბაშიძე დაუბალანსებელი კვების შედეგად გარდაიცვალა.
„გარდაცვალების ფაქტი უკვე შესწავლილია. პასუხისმგებლობა დაეკისრა სოფლის ექიმს, რომელსაც 4 თვით შეუჩერდა ექიმის ლიცენზია და ასევე დაეკისრა კვალიფიკაციის ამაღლება", - განაცხადა სერგეენკომ.
მინისტრმა ასევე, სოციალურ მუშაკებზეც ისაუბრა და აღნიშნა, რომ ისინი კანონის ფარგლებში მოქმედებდნენ, თუმცა გოგიტა აბაშიძის ფაქტთან დაკავშირებით გარდაცვალებამდე განგაში არ აუტეხავთ.
„ქაღალდზე კარგად არის დაწერილი სოფლის ექიმის პროექტი, თუმცა რაც ქაღალდზეა დაწერილი იმის ნახევარი რომ სრულდებოდეს, პროექტი წარმატებული იქნებოდა", - განმარტა მან.
მინისტრის ინფორმაციით, გოგიტა აბაშიძის გარდაცვალების ფაქტი პირველი არაა და მსგავსი შემთხვევა 2012 წლის დეკემბერში, საგარეჯოს რაიონშიც დაფიქსირდა.
გოგიტა აბაშიძე ბათუმის დედათა და ბავშვთა კლინიკაში, შოკურ მდგომარეობაში, 21 მარტს მოათავსეს.
მედიკოსების განცხადებით, მისი მდგომარეობა ხშირმა შიმშილობამ გამოიწვია. ბავშვს მასის დეფიციტი და ნაწლავური პრობლემები აღენიშნებოდა. ექიმებმა მისი გადარჩენა ვერ შეძლეს. ის 23 მარტს გარდაიცვალა.
