მთავრობის კანცელარიასთან მარტვილიდან ჩამოსული 30-მდე მოქალაქე უკვე მეოთხე დღეა შიმშილობს. როგორც „ჯი-ეიჩ-ენს" ერთ-ერთმა მოშიმშილე ზურაბ ბიგვავამ განუცხადა, აქციის მონაწილეთა რაოდენობა 100-მდე აღწევს.
მისი თქმით, აქციის მონაწლეებს დღეს კიდევ 20 მოქალაქე შეუართდება.
„გვაქვს ერთადერთი მოთხოვნა - შევხვდეთ პრემიერ-მინისტრ ბიძინა ივანიშვილს, თუმცა რაზე ვისაუბრებთ ამას მხოლოდ მას მოვახსენებთ. არის ისეთი საკითხები, რისი გახმაურებაც არ არის საჭირო. ეს შეხვედრა ძალიან მნიშვნელოვანია, როგორც ჩვენთვის ისე მთელი უმრავლესობისთვის", - განაცხადა ბიგვავამ.
მისივე თქმით, აქციის მონაწილეებს მთავრობის კანცელარიის წარმომადგენლები უკვე შეხვდნენ, თუმცა ისინი გვარების დასახელებისგან თავს იკავებენ.
აქციის მონაწლეთა განცხადებით, პრემიერი საქმის კურსშია და იმედოვნებენ, რომ მათთან შესახვედრად დროს გამონახავს.
„ალბათ დრო არ აქვს და აქამდე მაგიტომ ვერ გვხვდება. მანამ არ დავიშლებით, სანამ არ შევხვდებით", - აცხადებენ აქციის მონაწილეები და განმარტავენ, რომ შეხვედრაზე როგორც მარტვილის, ასევე მთელი სამეგრელოს პრობლემებზე ისაუბრებენ.
მარტვილელი მოქალაქეები პრემიერ-მინისტრთან შეხვედრის მოთხოვნით, რაიონიდან 7 აპრილს ჩამოვიდნენ.
