სრულიად საქართველოს კათოლიკოს-პატრიარქის ქორეპისკოპოსი, ახალციხისა და ტაო-კლარჯეთის მიტროპოლიტი თეოდორე (ჭუაძე) საქართველოს საგარეო საქმეთა მინისტრს, მაია ფანჯიკიძესა და საქართველოს კულტურისა და ძეგლთა დაცვის მინისტრს, გურამ ოდიშარიას წერილით მიმართავს და მოუწოდებს იშხნის მონასტრის რეაბილიტაცხიის პროცესში ქართველი სპეციალისტების ჩასართავად ადეკვატური ზომები მიიღონ. როგორც მიტროპოლიტის წერილში აღნიშნული,, გაცნობებთ, რომ ა.წ. 7-8 აპრილს მე, მცირე დელეგაციასთან ერთად ვიმოგზაურე თურქეთის რესპუბლიკაში, სადაც მოვინახულე ქართული ტაძრები და მონასტრები. სამწუხაროდ, ძალიან მძიმე მდგომარეობაში დაგვხვდა იშხანის მონასტერი, სადაც დაწყებულია ტაძრის გაწმენდითი სამუშაოები, გამოტანილია დიდი რაოდენობით მიწა და ქვები, რომლებიც გარეთ უწესრიგოდ არის მიმოფანტული. სამუშაოებს სამწუხაროდ, არ ესწრებიან ქართველი არქეოლოგები და ხელოვნებათმცოდნეები, რაც ჩვენი სიტყვიერი შეთანხმებიდან გამომდინარე სრულიად მიუღებელია. და ასევე გაუგებარი რამ დააჩქარა სარესტავრაციო სამუშაოების ჩატარება საბოლოო შეთანხმების მიღებამდე. გთხოვთ, სასწრაფოდ მიიღოთ ზომები, რათა დროებით შეჩერდეს სამუშაოები და უზრუნველყოფილ იქნას ქართველი სპეციალისტების მონაწილეობა შემდგომ საქმიანობაში", -ნათქვამია ახალციხისა და ტაო-კლარჯეთის მიტროპოლიტის წერილში.
