მთავრობის კანცელარიასთან მარტვილიდან ჩამოსული 25 მოქალაქე მეორე დღეა შიმშილობს. როგორც "ჯი-ეიჩ-ენს" ერთ-ერთმა მოშიმშილე ირაკლი ჯამბურიამ განუცხადა, პრემიერ-მინისტრ ბიძინა ივანიშვილთან შეხვედრის მოთხოვნით, 25 მოქალაქე შიმშილობს.
მისი თქმით, თბილისში მარტვილიდან სულ აქციის 60 მონაწილეა ჩამოსული.
"პრემიერს უბრალოდ გავესაუბრებით მარტვილში მიმდინარე პროცესებზე. კონკრეტულ საკითხებს პრემიერ-მინისტრს მოვახსენებთ. როდესაც საუბარს მოვრჩებით ყველაფერს მოგახსენებთ. აქ საუბარი მხოლოდ რეგიონში სტრუქტურულ ცვლილებებზე არაა. კონკრეტიკა არ არსებობს", - განაცხადა ჯამბურიამ.
მისი თქმით, იმ შემთხვევაში, თუ პრემიერი განაცხადებს, რომ მოშიმშილეებთან შეხვედრის სურვილი არ აქვს, მაშინ მათ აქციას აზრი არ ექნება და დაიშლებიან.
ჯამბურიას განცხადებით, 5-5 კაციანი ჯგუფები ყოველ დღე მორიგეობენ, ვისაც მოშიმშილეებისთვის წყალი მიაქვს.
მარტვილელი მოქალაქეები პრემიერ-მინისტრთან შეხვედრის მოთხოვნით, რაიონიდან გუშინ გამოემგზავრენ.
