მთაწმინდის რაიონის გამგებლის მოადგილე ივა ჭყონია ხელისუფლებას ზეწოლაში ადანაშაულებს. როგორც მან აღნიშნა, მას საქართველოს საზღვრის გადაკვეთის უფლებას არ აძლევენ.
მისი თქმით, საქართველოს ტერიტორიის დატოვება რამდენიმე დღის წინ სცადა, თუმცა, მესაზღვრეებმა ამის უფლება არ მისცეს, რის შედეგადაც, ფინანსთა სამინისტროს საგამოძიებო სამსახურში დაიბარეს.
"საზღვარზე რატომ ვერ გადავაადგილდები ნამდვილად ვერ გავერკვიე, იმიტომ, რომ დაახლოებით, ერთი კვირის წინ, როცა ვაპირებდი საზღვრის გადაკვეთას, აბსოლუტურად უკანონოდ გამაჩერეს. მასაუბრეს ვიღაც ფინანსური პოლიციის წარმომადგენელი და მთხოვეს, რომ ქვეყანა არ დამეტოვებინა", - განაცხადა ჭყონიამ.
მისი თქმით, მეორე დღეს ფინანსურ პოლიციაში გამოცხადდა და რა კითხვებიც ჰქონდათ, ყველას ამომწურავი პასუხი გასცა.
ჭყონიას განცხადებით, ახლა ფაქტიურად, პატიმრობაში იმყოფება, რადგან ქვეყნიდან ვერ გადის.
"არანაირი ფაქტი არ დევს, რომ არ მაქვს უფლკება საზღვარი გადავკვეთო. გამოდის, რომ ვარ ზეწოლის ქვეშ ალბათ. მე ამას სხვა ვერაფერ სახელს ვერ დავარქმევ", - აღნიშნა მან.
ჭყონიამ საზღვრის გადაკვეთა გუშინ კიდევ ერთხელ სცადა, თუმცა ამჯერადაც უშედეგოდ. ის საქმის შესწავლას ითხოვს.
