8 აპრილს, ვაშინგტონში, იუსტიციის სამინისტროს საჯარო რეესტრის ეროვნული სააგენტოს თავმჯდომარე ეკა კერესელიძე და საერთაშორისო ორგანიზაციებთან ურთიერთობის სამსახურის უფროსი ეკა მესხიძე მსოფლიო ბანკის მიერ ორგანიზებულ საერთაშორისო კონფერენციას დაესწრებიან.
კონფერენცია „მიწა და სიღარიბე", რომელიც 10 წელზე მეტია ყოველწლიურად იმართება, მიზნად ისახავს მსოფლიოს სხვადასხვა ქვეყნებში მიწის მმართველობის უახლეს მიდგომებთან დაკავშირებით დიალოგის ხელშეწყობას ხელისუფლებასა და სამოქალაქო საზოგადოების წარმომადგენლებს, აკადემიურ და ტექნიკურ ექსპერტებს შორის.
წლევანდელი კონფერენციის თემაა „მიწის მმართველობის გამჭვირვალობისკენ სვლა და სამომავლო ნაბიჯები".
კონფერენციაზე, საჯარო რეესტრის საერთაშორისო ორგანიზაციებთან ურთიერთობის სამსახურის უფროსი ეკა მესხიძე წარადგენს მოხსენებას თემაზე „მიწის ინფორმაციის სანდოობა საქართველოში".
მონაწილეები იმსჯელებენ ისეთ საკითხებზე, როგორიცაა მიწაზე საკუთრების უფლების დაცვა, მიწათსარგებლობის გაუმჯობესება და კერძო სექტორის ჩართვის აუცილებლობა, ქალაქგეგმარების საკითხების მოწესრიგება და სხვ.
კონფერენცია 11 აპრილს დასრულდება.