ამ ეტაპზე მოსახლეობას საფრთხე აღარ ემუქრება _ განაცხადა ,,ჯი-ეიჩ-ენთან" საუბარში თბილისის საგანგებო სიტუაციების სამსახურის ხელმძღვანელმა თემურ გიორგაძემ აეროპორტის ტერიტორიაზე მომხდარი სარკინიგზო ავარიის კომენტირებისას და აღნიშნა, რომ ამ დროისთვის სალიკვიდაციო სამუშაოები მიმდინარეობს.
,,მიმდინარეობს სალიკვიდაციო სამუშაოები. რაც შეეხება საფრთხეს ყველაფერი დადებითისკენ მიდის და სიტუაცია უსაფრთხო ხდება. რკინიგზის ხაზის აღდგენითი სამუშაოები ალბათ დღის ბოლომდე გაგრძელდება. თავად რკინიგზასაც მოუწევს სამუშაოების ჩატარება.Gგადატრიალებული ცისტერნები ადგილიდან უნდა გავიდეს. ხოლო უკვე შემდეგ ვამუშავებთ სპეციალურ ტექნიკას, რათა დაღვრილი დიზელი გავანეიტრალოთ," _განაცხადა თემურ გიორგაძემ და აღნიშნა, რომ ამ ეტაპზე მოსახლეობას საფრთხე აღარ ემუქრება.
შეგახსენებთ, რომ აეროპორტის მიმდებარე ტერიტორიაზე დღეს დილით სარკინიგზო ავარია მოხდა. საწვავით დატვირთული მატარებელი ლიანდაგიდან გადავიდა, რასაც ოთხი ვაგონის გადატრიალება მოჰყვა.შედეგად, დიზელის საწვავი დაიღვარა, რაც ისევ იღვრება. ადგილზე კვლავ რჩებიან საგანგებო სიტუაციების მართვის სამსახურის თანამშრომლები.ადგილზე ასევე, მუშაობს ტექნიკა, რათა საწვავმა მოსახლეობას პრობლემები არ შეუქმნას.
