ამერიკული კვლევითი ორგანიზაცია „გელაპის" მიერ საქართველოში ჩატარებული კვლევის თანახმად, ქართველი ახალგაზრდების 14 პროცენტი საზღვარგარეთ სამუდამოდ წასვლას ფიქრობს. რადიო `თავისუფლების" ცნობით, კვლევამ ყველა პოსტსაბჭოთა ქვეყანა მოიცვა. გამოკითხვა ჩატარდა ახალგაზრდებში, რომელთა ასაკიც 15 წელი და მეტი იყო.
კითხვა ასე დაისვა: „თუკი საშუალება მოგეცემოდათ, წახვიდოდით თუ არა საზღვარგარეთ სამუდამოდ საცხოვრებლად?" საქართველოში ამ კითხვას დადებითი პასუხი გამოკითხულთა 14-მა პროცენტმა გასცა.
ყველაზე მაღალი მაჩვენებელი დაფიქსირდა სომხეთში (40 პროცენტი), მას მოსდევს მოლდოვა (32 პროცენტი) და უკრაინა (21 პროცენტი). რუსეთსა და აზერბაიჯანში მაჩვენებელი ისეთივეა, როგორიც საქართველოში.
გამოკითხულთაგან 52 პროცენტი ამბობს, რომ საზღვარგარეთ გადასახლება იქ არსებული უკეთესი საცხოვრებელი პირობების გამო უნდა; 13 პროცენტი საკუთარი შვილების მომავალზე ფიქრობს (თუმცა საქართველოში ეს მაჩვენებელი 8 პროცენტია); 10 პროცენტს მიაჩნია, რომ საზღვარგარეთ კარგ სამსახურს იშოვის; საკმაოდ დიდმა ნაწილმა (12 პროცენტი) ზუსტად არ იცის, თუ რატომ სურს საზღვარგარეთ წასვლა.
