22, 23 და 24 აპრილს ჩეხეთის დედაქალაქი პრაღა, თბილისის დღეებს უმასპინძლებს. პრაღაში "თბილისის დღეები" ანსამბლ "ქართული ხმების" კონცერტით გაიხსნება. პრაღის მერია უმასპინძლებს ძველი თბილისის რეაბილიტაციის ამსახველ ფოტო გამოფენას. ქალაქის ერთერთ მთავარ მოედანზე ორ კონცერტს გამართავს ე.მიქელაძის სახელობის სახელმწიფო სიმფონიური ორკესტრის ჩასაბერ ინსტრუმენტთა ანსამბლი "GEORGIAN BRASS", თითების თეატრი ორ სპექტაკლს წარმოადგენს თეატრში "მინორი", პრაღის მუნიციპალურ მუზეუმში კი გაიმართება თბილისის მუნიციპალური მუზეუმების თემატური გამოფენა.
აღსანიშნავია, რომ 2012 წლის ნოემბრის თვეში თბილისში, პრაღის კულტურის დღეები გაიმართა, რომელზეც წარმოდგენილი იქნა პრაღის ნაციონალური საბალეტო დასის ორი წარმოდგენა: გამოფენა სახელწოდებით "პანორამული პრაღა" , ცნობილი ახალგაზრდა ჩეხი პიანისტის ივო კაჰანიკის კონცერტი და ქუჩის თეატრ V.O.S.A.-ს წარმოდგენები .
პრაღაში "თბილისის დღეების" ჩატარება სწორედ გასულ წელს აღნიშნული ღონისძიებების მიმდინარეობისას ოფიციალური ვიზიტის ფარგლებში შეთანხმდა.