"ნაცხროვა უნდა გასამართლდეს" - ამ სახელწოდებით ხმაურიანი აქცია ყოფილმა პატიმრებმა დღეს "ნაციონალური მოძრაობის" ბათუმის საქალაქო ორგანიზაციის ოფისთან გამართეს.
საპროტესტო აქციაზე შეკრებილი მოქალაქეები "ნაციონალური მოძრაობის" 9-წლიანი მმართველობის გასამართლებას მოითხოვდნენ.
როგორც აქციის ერთ-ერთმა მონაწილე, ყოფილმა პოლიტპატიმარმა ცოტნე ანანიძემ აღნიშნა, "ნაციონალურმა მოძრაობამ" უნდა აიღოს პასუხისმგებლობა იმაზე, რომ წლების განმავლობაში საქართველოს მოქალაქეებს პოლიტიკური მოტივაციით დევნიდა.
"დღეს, სამწუხაროდ ისევ გვესმის ურცხვი რიტორიკა, რომ ვართ ჩვეულებრივი კრიმინალები და არა ის მოქალაქეები, რომლის მოქმედებაც არ შედიოდა ხელისუფლების ინტერესებში და სწორედ ეს მოქმედება გახდა საფუძველი იმისა, რომ ჩვენ ასეულობით დღე გავატარეთ საპატიმრო დაწესებულებებში", - განაცხადა ანანიძემ.
აქციის მონაწილეებს მოგვიანებით, "ნაცმოძრაობის" საქალაქო ორგანიზაციის ხელმძღვანელი გიორგი კირთაძე შეხვდა.
მისი განცხადებით, საპროტესტო შეკრება პოლიტიკურად მართული იყო, პოლიტპატიმრის სტატუსი კი, პარლამენტს ყველა მათგანისთვის არ ნდა მიენიჭებინა.
აქციის მონაწილეებსა და "ნაციონალური მოძრაობის" წარმომადგენლებს შორის სიტყვიერი დაპირისპირებაც მოხდა. ადგილზე მობილიზებული იყო საპატრულო პოლიცია.
