100 მლნ 778 ათას 324 ლარი გადასახადის გადამხდელთა სასარგებლოდ - ასეთია შემოსავლების სამსახურის დავების საბჭოს საქმიანობის 2013 წლის პირველი კვარტალის შედეგი.
შემოსავლების სამსახურის დავების საბჭოს მიმართ გადასახადის გადამხდელთა განსაკუთრებული ინტერესის გათვალისწინებით, ვაქვეყნებთ დავების საბჭოს 2013 წლის პირველი კვარტალის საქმიანობის შედეგებს. კერძოდ, შემოსავლების სამსახურმა 2013 წლის პირველ კვარტალში არსებითად განიხილა 2574 საჩივარი, საიდანაც სრულად დაკმაყოფილდა 362 საჩივარი, ნაწილობრივ დაკმაყოფილდა 1620 საჩივარი, არ დაკმაყოფილდა 592 საჩივარი. აღნიშნულ პერიოდში გადამხდელების მიერ გასაჩივრებული სადავო თანხის ოდენობა შეადგენდა 219,157,164 ლარს, საიდანაც დაკმაყოფილდა 100,778,324 ლარი. მათ შორის, საქართველოს საგადასახადო კოდექსის 269-ე მუხლის მე-7 ნაწილის შესაბამისად, დავის განმხილველმა ორგანომ, კეთილსინდისიერი გადამხდელის პრინციპიდან გამომდინარე, 172 გადამხდელი დარიცხული სანქციისაგან მთლიანად გაათავისუფლა. 2013 წლის პირველ კვარტალში შემოსავლების სამსახურში ასევე წარმოდგენილი იყო 697 საჩივარი, სადავო 34,693,700 ლარის ოდენობით. ეს საჩივრები განუხილველი დარჩა, ვინაიდან კანონმდებლობის შესაბამისად შემოსავლების სამსახური მოკლებული იყო შესაძლებლობას, არსებითად ემსჯელა გასაჩივრებულ საკითხზე. ასევე აღსანიშნავია, რომ შემოსავლების სამსახურში განხილული საჩივრებიდან გადამხდელთა მხოლოდ 15 პროცენტმა გადაწყვიტა დავის შემდგომი გაგრძელება ფინანსთა სამინისტროსთან არსებულ დავების განხილვის საბჭოში.
აღსანიშნავია ისიც, რომ, ზოგადად, შემოსავლების სამსახურის, ასევე დავების საბჭოს საქმიანობა მაქსიმალურად გამჭვირვალე გახდა. 2013 წლიდან, შემოსავლების სამსახურის შეთავაზების თანახმად, დავების საბჭო ღიაა არასამთავრობო ორგანიზაციებისა და მედიის წარმომადგენლებისათვის.
აღსანიშნავია შემოსავლების სამსახურის ძალისხმევა გადამხდელთა სათანადო და დროული ინფორმირების კუთხით, რაც, თავის მხრივ, დადებითად აისახა გადასახადების ადმინისტრირების ხარისხზე. შესაბამისად, 2013 წლის პირველ კვარტალში ქვეყანაში საგადასახადო და საბაჟო შემოსავლების კუთხით 1615 მილიარდი ლარია მობილიზებული, რაც გასული წლის ანალოგიურ პერიოდს 63,5 მილიონი ლარით აღემატება. ზრდის პროცენტმა 4,1% შეადგინა. განსაკუთრებით მაღალია საშემოსავლო გადასახადის ზრდის ტემპი. აღნიშნული მაჩვენებელი 448,9 მილიონ ლარს შეადგენს, რაც გასული წლის შესაბამის მაჩვენებელს 19,0%-ით აღემატება.
