დღეს შინაგან საქმეთა მინისტრი ირაკლი ღარიბაშვილი და ამერიკის
შეერთებული შტატების ელჩი საქართველოში რიჩარდ ნორლანდი სანაპირო დაცვის
დეპარტამენტის სადგურ ,,სუფსა"-ს ტერიტორიაზე ერთობლივი საზღვაო
ოპერაციების მართვის ცენტრის საძირკვლის ჩაყრის ცერემონიას დაესწრნენ.
შს მინისტრმა და აშშ-ს ელჩმა ნიჩბით საძირკველი სიმბოლურად „გაჭრეს".
ღონისძიებაზე მისასალმებელი სიტყვა რიჩარდ ნორლანდმა და ირაკლი
ღარიბაშვილმა წარმოთქვეს.
დღესვე, სანაპირო დაცვის დეპარტამენტის ფოთის ბაზაზე საინჟინრო
გემთსარემონტო სახელოსნოს გახსნის ცერემონიაც გაიმართა, რომელსაც შინაგან
საქმეთა მინისტრი ირაკლი ღარიბაშვილი და ამერიკის შეერთებული შტატების
ელჩი საქართველოში რიჩარდ ნორლანდი დაესწრნენ. შს მინისტრმა სანაპირო
დაცვის განვითარებაში შეტანილი წვლილისა და ნაყოფიერი თანამშრომლობისათვის
საქართველოში აშშ-ს საელჩოს საფრთხეების შემცირების სამსახურის უფროსი,
საჰაერო ძალების ვიცე-პოლკოვნიკი ბლეიქ ფარლეი სანაპირო დაცვის საიუბილეო
მედლით დააჯილდოვა. მინისტრმა აგრეთვე დააჯილდოვა აშშ-ს საელჩოს ექსპორტისა
და საზღვრის უსაფრთხოების პროგრამის ხელმძღვანელი - დეივიდ ნილსი და აშშ-ს
საელჩოს ექსპორტისა და საზღვრის უსაფრთხოების პროგრამის მრჩეველი საზღვაო
საკითხებში - ჯონ ქარენი.
ირაკლი ღარიბაშვილმა და რიჩარდ ნორლანდმა სანაპირო დაცვის თანამშრომლებთან
ერთად გემების სარემონტო ძველი სახელოსნო დაათვალიერეს და შემდეგ ახალი
შენობა საზეიმოდ გახსნეს.
მასალის გამოყენების პირობები
