2 აპრილს 14 საათზე ქართველ პატრიოტთა არასამთავრობო ორგანიზაცია „ეროვნული ფრონტი" თურქეთის საელჩოს წინ აწყობს ბრიფინგს მედიისთვის, სადაც წაკითხული იქნება სპეციალური მიმართვა თურქეთის ელჩისადმი.
როგორც ”ჯი-ეიჩ-ენს” ”ეროვნული ფრონტის” ერთ-ერთმა ხელმძღვანელმა ევგენი მიქელაძემ განუცხადა, მიმართვაში დაგმობილია თურქეთის ხელისუფლების მიერ საქართველოს ხელისუფლებაზე წარმოებული ზეწოლა ბათუმში მეჩეთის მშენებლობისა და მესხეთელი თურქების საქართველოში შემოსახლებასთან დაკავშირებით.
„ეროვნული ფრონტი", ასევე, გმობს თურქეთის საგარეო საქმეთა მინისტრის აჰმედ დავით-ოღლუს მიერ საქართველოში ამასწინანდელი ვიზიტის დროს გაკეთებულ განცხადებას და მოწოდებას იმასთან დაკავშირებით, რომ საქართველოს სახელმწიფომ თურქულ სავაჭრო გემებს მოუხსნას აფხაზეთის ტერიტორიულ წყლებში შესვლის შეზღუდვა. მსგავს განცხადებას ჩვენ განვიხილავთ სეპარატისტული აფხაზეთის მხარდაჭერად. ამავე დროს, „ეროვნული ფრონტი" კიდევ ერთხელ შეახსენებს თურქეთის ელჩს, რომ თურქეთი ვალდებულია ანექსირებული ტაო-კლარჯეთის ტერიტორიაზე არსებული ქართული კულტურულ-რელიგიური ძეგლები აღადგინოს ყოველგვარი წინაპირობის და „გაცვლის" გარეშე „კულტურული მემკვიდრეობის შესახებ" იუნესკოს კონვენციის თანახმად”, -განაცხადა მიქელაძემ
მისი თქმით, თუ თურქეთის სახელმწიფო არ შეწყვეტს ზეწოლას საქართველოს სახელმწიფოზე ყველა ზემოაღნიშნულ საკითხთან დაკავშირებით, „ეროვნული ფრონტი" იტოვებს უფლებას დაიწყოს საზოგადოებრივი კამპანია საქართველოსა და მის ფარგლებს თურქული პროდუქციის და სერვისების, ზოგადად, ბიზნესის ბოიკოტირების მიზნით.
