საქართველოს ვიცე-პრემიერი კახი კალაძე და აჭარის მთავრობის თავმჯდომარე არჩილ ხაბაძე სტიქიით მიყენებული ზიანის აღდგენითი სამუშაოების მიმდინარეობას გაეცნენ. თავდაპირველად მათ ბათუმის სანაპირო ზოლი დაათვალიერეს, რომელიც გაწმენდილია შტორმის შედეგად შემოტანილი ქვა-ღორღისაგან. ასევე აქტიურად მიმდინარეობს სტიქიით დაზიანებული შენობების გადახურვა და რეაბილიტაცია.
„ძალიან კარგად მიმდინარეობს როგორც სანაპიროს, ასევე კერძო სახლების აღდგენითი სამუშაოები. ფაქტობრივად შენობების გადახურვა სრულდება. სანაპირო ზოლის აღდგენის მთავარი სამუშაოები ძალიან მალე დაიწყება და საკურორტო სეზონისთვის ყველა სახის სამუშაო დასრულებული იქნება. ბატონ პრემიერს მოვახსენებთ გაწეულ სამუშაოებზე" - განაცხადა კახი კალაძემ.
ვიცე-პრემიერმა და მთავრობის თავმჯდომარემ მიყენებული ზიანის სალიკვიდაციო სამუშაოები ქობულეთში, გელაურის დასახლებაშიც მოინახულეს. მოსახლეობამ კმაყოფილება გამოთქვა და მადლობა გადაუხადა მთავრობას სწრაფი რეაგირებისთვის. მთავრობის წარმომადგენლებმაც დადებითად შეაფასეს ჩატარებული სამუშაოები.
„რამდენიმე დღეში გამოცხადდება ტენდერი სარეაბილიტაციო სამუშაოების შემსრულებელი ფირმის გამოსავლენად. გამარჯვებული კომპანია ბათუმში 200 მეტრიანი საფეხმავლო ბილიკის აღდგენით სამუშაოებს განახორციელებს. პარალელურად ხელვაჩაურის მუნიციპალიტეტში მიმდინარეობს და თითქმის დასრულებულია დაზიანებული სახლების გადახურვა და შეკეთება. რეგიონი საკურორტო სეზონს მომზადებული შეხვდება"- განაცხადა არჩილ ხაბაძემ სამუშაოების დათვალიერების შემდეგ.
