28 მარტის მონაცემებით, საქართველოში წითელას 504 შემთხვევაა დაფიქსირებული.
როგორც დაავადებათა კონტროლის და საზოგადოებრივი ჯანმრთელობის ეროვნული ცენტრის ვებ-გვერდზეა აღნიშნული, ვირუსი ლაბორატორულად უკვე 504 მოქალაქეს დაუდასტურდა, მათგან 175-ის ჰოსპიტალიზაცია გახდა საჭირო.
ვირუსის შემთხვევები უმეტესად დედაქალაქში ფიქსირდება. 504 შემთხვევიდან 394 თბილისში რეგისტრირდება.
ამასთან, ჯანმრთელობის მინისტრმა დავით სერგეენკომ განაცხადა, რომ საჭიროების შემთხვევაში, სამინისტრო წითელას საწინააღმდეგო ვაქცინებს შემოიტანს.
შესაბამისი ნებართვა ჯანდაცვის სამინისტრომ მთავრობისგან უკვე მიიღო.
"დაახლოებით, ერთი თვის უკან ჯანდაცვის სამინისტრომ წარმოადგინა პროგრამა. წითელაზე მართლაც საყურადღებო მდგომარეობაა, რადგანაც შემთხვევები მომატებულია. დღეს მთავრობისგან ავიღეთ ნებართვა, რომ საჭიროების შემთხვევაში ვაქცინების დამატებითი რაოდენობა შევისყიდოთ", - განაცხადა სერგეენკომ.
მისივე თქმით, დღეისთვის ქვეყანაში ვაქცინების სათანადო მარაგები არსებობს და დეფიციტი არ არსებობს.
მინისტრის განცხადებით, ეს არის მზადყოფნა, რაც საჭიროების შემთხვევაში უნდა ამოქმედდეს.