თელავში ახალი სამედიცინო ცენტრი გაიხსნა, რომელიც აღჭურვილია უახლესი აპარატურით და შეესაბამება საერთაშორისო სტანდარტებს. რეფერალური საავადმყოფო გათვლილია 70 საწოლზე და დაკომპლექტებულია მაღალკვალიფიციური მედპერსონალით, კლინიკაში დასაქმებულია 300-ზე მეტი ადგილობრივი და მოწვეული სპეციალისტი თბილისიდან.
ახლადგახსნილ თელავის რეფერალურ საავადმყოფოში ადგილობრივი მოსახლეობისათვის საკუთარ ქალაქშივე ხდება ხელმისაწვდომი ჰოსპიტალური, ამბულატორიული და პრე-ჰოსპიტალური სერვისების მიღება კომფორტულ და თანამედროვე ტიპის პალატებსა და საკონსულტაციო კაბინეტებში. ასევე, ახლადგახსნილი საავადმყოფო მომავალ მშობლებს სთავაზობს სამეანო გინეკოლოგიურ სრულ პაკეტს, დღეიდან კახეთში მცხოვრებ მშობიარე ქალბატონებს საშუალება ექნებათ რეგიონიდან გაუსვლელად მიიღონ მაღალი ხარისხის სამედიცინო მომსახურება პროფესორ-გინეკოლოგის ლევან მაყაშვილისა და თბილისიდან მოწვეული სპეციალისტებისგან.
თელავის რეფერალური საავადმყოფო გახსნის დღესთან დაკავშირებით პირველ დღეს უფასოდ, ხოლო შემდეგი ერთი კვირის განმავლობაში 50% იანი ფასდაკლებით ადგილობრივ მოსახლეობას სთავაზობს სხვადასხვა სახის სამედიცინო მომსახურებას - მშობიარობას, 4D ექოსკოპიას, ციფრულ რენტგენს და ა.შ.
თელავის რეფერალურ საავამდყოფოში 8 მლნ. ლარზე მეტი ინვესტიცია განხორციელდა.
