საქართველოს დელეგაცია დღეს, გამთენიისას ჟენევაში გაემგზავრა.
მოლაპარაკებებზე ოკუპირებულ რეგიონებში ვითარების სტაბილიზაციაზე ძალის გამოუყენებლობის გარანტიებზე, ასევე მოსახლეობის გადაადგილების პრობლემებზე, ჰუმანიტარული და სოციალურ-ეკონომიკური მდგომარეობის გაუმჯობესებაზე გამახვილდება ყურადღება.
საქართველოს დელეგაციას, რომელიც ჟენევაში ახალი შემადგენლობით გაემგზავრა, საგარეო საქმეთა მინისტრის პირველი მოადგილე დავით ზალკალიანი უხელმძღვანელებს.
რეინტეგრაციის საკითებში სახელმწიფო მინისტრის პირველი მოადგილის ქეთევან ციხელაშვილის განცხადებით, ერთ-ერთ ცენტრალურ საკითხად მოქალაქეთა გადაადგილების თემის დასმას გეგმავს.
"ვაპირებთ, რომ ერთ-ერთ ცენტრალურ საკითხად დავსვათ სწორედ ადამიანების გადაადგილების თემა და გამოწვევები და პრობლემები, რომელიც ექმნება მოსახლეობას ძალიან მწვავედ, მათ შორის ორივე მიმართულებით ცხინვალის რეგიონისა და აფხაზეთის რეგიონის მიმართულებით - იგივე მავთულხლართების პრობლემა", - განაცხადა ციხელაშვილმა.
მისივე თქმით, განიხილება ასევე, ენგურზე გადასვლის საკითები და მიმოსვლის თემები.
ჟენევის მოლაპარაკებათა მორიგი რაუნდი 26-27 მარტს გაიმართება.