დევნილებისთვის საცხოვრებელი ფართების გადაცემა რეგიონების გარდა, თბილისშიც იქნება შესაძლებელი.
როგორც ოკუპირებული ტერიტორიებიდან იძულებით გადაადგილებულ განსახლებისა და ლტოლვილთა მინისტრმა დავით დარახველიძემ დღევანდელ პრესკონფერენციაზე განაცხადა, სამინისტროს სტრატეგიაში შევიდა ცვლილება, რომელიც დევნილებისთვის ბინების გადაცემას არა მხოლოდ რეგიონებში, არამედ თბილისშიც გულიხმობს.
მისი თქმით, თბილისში 20 000 ოჯახზე მეტი დევნილია და სამიზნე ჯგუფებისთვის განმსაზღვრელი უპირატესობა რეგისტრაციის ადგილს მიენიჭება.
"თბილისში რეგისტრაციაზე შეზღუდვა არ არსებობს, თუმცა მაქსიმუმ 5 წელი უნდა ცხოვრობდეს დევნილი თბილისში, რომ მისი რეგისტრაცია მოხდეს. ასე რომ, გამოთქმული შეშფოთება - თითქოს ეს გამოიწვევს ყველა დევნილის თბილისში ჩამოსვლას, უსაფუძვლოა", - განაცხადა მინისტრმა.
მისივე თქმით, რეგისტრაციის გასავლელად დევნილს 5 წელი უნდა ჰქონდეს თბილისში ნაცხოვრები, 5 წელიწადში კი ეს პრობლემა გადაწყვეტილი უნდა იყოს.
"ჩვენ მძიმე მემკვიდრეობა გვერგო. პირველი კი, რაც გავაკეთეთ - სამინისტროს კარი გავხსენით", - აღნიშნა დარახველიძემ და დასძინა, რომ ეს იყო უნდობლობის და გაუცხოების მომენტი.
