ყოფილი პოლიტპატიმარი ვაჰაგან ჩახალიანი ქუთაისში, პარლამენტის შენობაში იმყოფებოდა.
ჩახალიანი პარლამენტის ფოიეში ჟურნალისტებმა შენიშნეს და ტელეკამერებმაც დააფიქსირეს.
ამ დრომდე უცნობია თუ რა საკითხზე და კონკრეტულად ვისთან იმყოფებოდა ვაჰაგან ჩახალიანი საკანონმდებლო ორგანოში. მას ჟურნალისტებთან კომენტარი არ გაუკეთებია.
საპარლამენტო ფრაქცია "ქართული ოცნების" წევრის გიორგი ვოლსკის განცხადებით, ის ჩახალიანის პარლანეტში ვიზიტთან დაკავშირებით საქმის კურსში არ არის.
"არა ვარ საქმის კურსში. დღეს ილაპარაკა საკმაოდ ვრცლად და საინტერესოდ პაატა ზაქარეიშვილმა საერთოდ სამცხე-ჯავახეთში არსებულ ვითარებასთან დაკავშირებით, კონფლიქტებზე ილაპარაკა ასევე. ჩახალიანთან დაკავშირებით კურსში არა ვარ", - განაცხადა ვოლსკიმ.
ვაჰაგან ჩახალიანმა სასჯელაღსრულების დაწესებულება ცოტა ხნის წინ ფართომასშტაბიანი ამნისტიის განხორციელების შემდეგ დატოვა.
ჩახალიანი ერთ-ერთია იმ გათავისუფლებულ მსჯავრდებულთა შორის, რომელთა გამოც, საპარლამენტო უმცირესობა ქვეყნის ახალ ხელისუფლებას აკრიტიკებს.
