საქართველოს ახალგაზრდა იურისტთა ასოციაციის თავმჯდომარე კახა კოჟორიძის განცხადებით, საზოგადოებრივი მაუწყებლის ყოფილი გენერალური დირექტორის გიორგი ბარათაშვილის თანამდებობიდან გადაყენების გადაწყვეტილება გაუქმდება.
როგორც მან "მაესტროს" პრესკლუბში განაცხადა, ბარათაშვილის სარჩელი სასამართლომ დასაშვებად სცნო.
მისი თქმით, სასამართლოს განჩინებით დაკმაყოფილებულია საია-ს შუამდგომლობა და გენერალური დირექტორის შესარჩევი კონკურსი შეჩერებულია.
"მოსამზადებელი სხდომა ჩანიშნულია 8 აპრილისთვის და მე ძალიან დიდი იმედი მაქვს, რომ კიდევ უფრო მეტ წარმატებას მივაღწევთ საქმის არსებითი განხილვის შემდეგ, გამომდინარე იქიდან, რომ ამ სარჩელში ყველაფერი არის ცალსახა და ნათელი. ეს არის ძალიან მარტივი საქმე იურიდიული თვალსაზრისით. იმან, ვინც იცის ელემენტარული მათემატიკა 15-ის ფარგლებში, ძალიან მარტივად გასცემს ამ საქმეში არსებულ კითვებს პასუხს", - განაცხადა კოჟორიძემ.
მისი თქმით, საქმეში მთავარი კითხვაა - სწორად გათავისუფლდა თუ არა გიორგი ბარათაშვილი დაკავებული თანამდებობიდან.
კოჟორიძის განცხადებით, საია სარჩელით ძალიან ბევრ კანონდარღვევაზე საუბრობს, თუმცა, მათ შორის ყველაზე ნათელი ის გარემოებაა, რომ ბორდმა გადაწყვეტილება 9 ხმის უმრავლესობით მიიღო მაშინ, როცა "მაუწყებლის შესახებ" კანონის თანახმად, მსგავს გადაწყვეტილებას საბჭოს სრული შემადგენლობის 2/3 სჭირდება.
"კანონში წერია, რომ საბჭო შედგება 15 წევრისგან, ხოლო 2/3 საბჭოს 10 წევრი გამოდის. 9 პირი როგორი დარღვევაც არ უნდა ჩაედინა გიორგი ბარათაშვილს არ იყო საკმარისი, რომ ასეთი გადაწყვეტილება მიეღო. ვფიქრობ და თითქმის დარწმუნებული ვარ, რომ აუცილებლად გაუქმდება გადაწყვეტილება", - აღნიშნა კახა კოჟორიძემ.
მისივე განმარტებით, გადაწყვეტილების არგაუქმების კონტრ არგუმენტი უბრალოდ არ არსებობს, რადგან ეს ცალსახად უკანონო გადაწყვეტილებაა.
თბილისის საქალაქო სასამართლომ საზ.მაუწყებლის გენ.დირექტორის ვაკანტურ თანამდებობის დასაკავებლად მიმდინარე ღია კონკურსი 15 მარტს შეაჩერა.
გიორგი ბარათაშვილი სარჩელით, რომლითაც ის სამეურვეო საბჭოს 2013 წლის 04 მარტის გადაწყვეტილების ბათილად ცნობას, სამუშაოზე აღდგენასა და იძულებითი განაცდურის ანაზღაურებას ითხოვს.
