განათლების, მეცნიერებისა და კულტურის კომიტეტის სხდომაზე „პროფესიული თეატრების შესახებ" კანონპროექტი II მოსმენით განიხილეს. მომხსენებლის, პარლამენტის წევრის, ალექსანდრე ქანთარიას განცხადებით, კანონპროექტთან დაკავშირებით თეატრის მოღვაწეებთან ფართო განხილვები შედგა, რომლის დროსაც კულტურის მესვეურებმა საკუთარი მოსაზრებები გამოთქვეს. ამასთან ერთად, კანონპროექტში II მოსმენისთვის კულტურის სამინისტროსგან წარმოდგენილი შენიშვნებიც აისახა.
კომიტეტმა II მოსმენით „ზოგადი განათლების შესახებ" საქართველოს კანონში ცვლილების შეტანის თაობაზე" კანონპროექტიც განიხილა. განათლებისა და მეცნიერების მინისტრის მოადგილის, დავით ლომინაშვილის ინფორმაციით, სამინისტრო უახლოეს პერიოდში პარლამენტს ახალ საკანონმდებლო ინიციატივას წარუდგენს, რომელიც ზოგადსაგანმანათლებლო დაწესებულებებში ახალი მმართველობითი მოდელის დანერგვას გულისხმობს. შესაბამისად, სანამ მოხდება ახალი მოდელის დამკვიდრება, სკოლების სამეურვეო საბჭოებს საკუთარი უფლებამოსილებების ვადა 4 თვით გაუხანგრძლივდებათ.
პარლამენტის პრესსამსახურის ინფორმაციით, სხდომაზე თავდაცვის სამინისტროს იურიდიული დეპარტამენტის უფროსმა, ვეფხია გრიგალაშვილმა კომიტეტის წევრებს „სამხედრო ვალდებულებისა და სამხედრო სამსახურის შესახებ" საქართველოს კანონში ცვლილების შეტანის თაობაზე" კანონპროექტი წარუდგინა.
ცვლილებებით წვევამდელს სამხედრო სავალდებულო სამსახურში გაწვევა გადაუვადდება თუ იგი ზოგადსაგანმანათლებლო დაწესებულების დასრულების წელს ერთიან ეროვნულ გამოცდებს გაივლის. განათლების, მეცნიერებისა და კულტურის კომიტეტმა სპორტისა და ახალგაზრდულ საქმეთა კომიტეტთან ერთად პრეზიდენტის მიერ რატიფიცირებისათვის წარმოდგენილი „საქართველოსა და ხორვატიის რესპუბლიკას შორის შემოსავლებსა და კაპიტალზე ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ" შეთანხმება განიხილა.
კომიტეტის სხდომაზე განხილულ საკითხებზე პარლამენტის პლენარული სხდომა იმსჯელებს.
