როგორც სახალხო დამცველის განცხადებაშია ნათქვამი, ბრალდებულმა ბაჩანა ახალაიამ წერილობით რაიმე სახის ინფრომაციის მიწოდებაზე უარი განაცხადა.

განცხადების თანახმად, ბრალდებულებმა ვიქტორ ყაჭეიშვილმა, ოლეგ ფაცაციამ, ლევან ფურცხვანიძემ, გურამ ცომაიამ, გაგა მკურნალიძემ და დავით ხუჭუამ სახალხო დამცველის წარმომადგენლებთან საუბრისას განაცხადეს, რომ გლდანის #8 დაწესებულებაში 2013 წლის 10 მარტს გადაიყვანეს და 11 მარტიდან 15 მარტის ჩათვლით, დაწესებულებაში მყოფი პატიმრების მიერ მათ მიმართ სისტემატურად ხორციელდებოდა ფსიქოლოგიური ზეწოლა.

"მათი განცხადებით, აღნიშნული გამოიხატებოდა შემდეგში - ადმინისტრაციულ კორპუსში გადაყვანის დროს, პატიმრები ჩერდებოდნენ პირველი კორპუსის წინ, მიმდებარე ტერიტორიაზე და მათ აყენებდნენ სიტყვიერ შეურაცხყოფას. ასევე ადგილი ჰქონდა მუქარას. ბრალდებულთა განცხადებით სიტყვიერი შეურაცხყოფა და მუქარა 5 დღის განმავლობაში გრძელდებოდა", - აცხადებენ სახალხო დამცველის აპარატში.

ბრალდებულების განმარტებით, 13 და 14 მარტს, პატიმრების მხრიდან ადგილი ჰქონდა დაწესებულების მოქმედი თანამშრომლის მიმართ წინააღმდეგობის გაწევის ფაქტს, რადგან თანამშრომელი ცდილობდა მათი შეურაცხმყოფელი საქციელი აღეკვეთა.

სახალხო დამცველის აპარატის ინფორმაციით, ბრალდებულები გ. მკურნალიზე და დ. ხუჭუა აცხადებენ, რომ ზემოაღნიშნულიდან გამომდინარე ისინი ფსიქოლოგიურ ზეწოლას განიცდიან, რაც მათ ფსიქიკურ ჯანმრთელობას სერიოზულ ზიანს აყენებს.

"ისინი ასევე აცხადებენ, რომ თავს ვერ გრძნობენ უსაფრთხოდ და ითხოვენ სპეციალურ დაწესებულებაში გადაყვანას, სადაც დაცული იქნებიან არაადამიანური მოპყრობისგან და დაცული იქნება მათი უსაფრთხოება. ბრალდებულებმა განაცხადეს, რომ მათ სიტყვიერად არაერთხელ მიმართეს #9 დაწესებულების ადმინისტრაციას, რომ არ მომხდარიყო მათი #8 დაწესებულებაში გადაყვანა, ვინაიდან მიაჩნიათ, რომ #8 დაწესებულებაში მათი მოთავსება დაუშვებელია", - ნათქვამია განცხადებაში.

საქართველოს სახალხო დამცველი სასჯელაღსრულების სამინისტროს მოუწოდებს, გამოიყენოს ყველა მის ხელთ არსებული საშუალება, რათა დაცული იყოს მსჯავრდებულების უსაფრთხოება და მათ სიცოცხლესა და ჯანმრთელობას რაიმე სახის ზიანი არ მიადგეს.