კულტურული მემკვიდრეობის თვალსაზრისით ღირებულ 26 ობიექტს კულტურული მემკვიდრეობის უძრავი ძეგლის სტატუსი მიენიჭა. კულტურისა და ძეგლთა დაცვის მინისტრის მირიანე ოდიშარიას ბრძანებულებით, სტატუსი 26 ობიექტმა მიიღო, რომლებიც თერჯოლის, ახალციხის, თელავის, გორის, ჭიათურის, წყალტუბოს, ახმეტის მუნიციპალიტეტებსა და ქალაქ ქუთაისში არიან განლაგებულნი. გამოქვეყნებული ბრძანებულების მიხედვით ირკვევა, რომ მინისტრმა კულტურული მემკვიდრეობის უძრავი ძეგლის სტატუსი მიანიჭა: თერჯოლის მუნიციპალიტეტში მდებარე რამდენიმე ეკლესიას, ხიდსა და ორ გამოქვაბულს.
კულტურული მემკვიდრეობის ძეგლის სტატუსი ასევე მიენიჭათ: ახალციხის მუნიციპალიტეტის, სოფ. წყალთბილაში მდებარე წყალთბილას ეკლესიას, თელავში მდებარე - კისისხევის იოანე ნათლისმცემლის ეკლესიას და ასევე კოშკს, გორის მუნიციპალიტეტში მდებარე - "წმ. გიორგი"-ს, ანტონ ფურცელაძის სახლს, ჟურულების საცხოვრებელი სახლს, ნიკო ლომოურის სახლს, ჭიათურაში მდებარე - ძუძუანას მღვიმეს, კოტიას კლდეს; წყალტუბოში მდებარე - საწურბლიას მღვიმეს; ახმეტაში მდებარე - "წამებული"-ს ეკლესიას; ქუთაისში მდებარე - V-VII საუკუნეების აბანოს (აბანოს კომპლექსი) და VI-VII საუკუნეების ეკლესიას.
"დაევალოს კულტურული მემკვიდრეობის სტრატეგიის, ორგანიზაციების კოორდინაციისა და ნებართვების დეპარტამენტს ამ ბრძანების ამოქმედებიდან ერთი თვის ვადაში ბრძანების დანართში მითითებული ობიექტების მონაცემების სამინისტროს ინტერნეტგვერდზე ასახვა;
ეთხოვოს კულტურული მემკვიდრეობის დაცვის საბჭოს წარმოადგინოს შესაბამისი დასკვნა დანართში მითითებული ძეგლებისათვის კატეგორიის მინიჭების თაობაზე"- ნათქვამია ბრძანებულებაში.
ბრძანება შეიძლება გასაჩივრდეს დაინტერესებული მხარის მიერ ოფიციალური გაცნობიდან ერთი თვის ვადაში საქართველოს მთავრობაში