საზოგადოებრივი მაუწყებლის საინფორმაციო სამსახურის უფროსი ხათუნა ბერძენიშვილი თანამდებობიდან გათავისუფლებულია, - ამის შესახებ ბერძენიშვილმა საგანგებო პრესკონფერენციაზე განაცხადა .
მისივე განცხადებით, პირველი არხის ხელმძღვანელის, გიორგი ბარათაშვილის გადაწყვეტილებით, იგი თანამდებობიდან დღეს გათავისუფლდა.
"გიორგი ბარათაშვილის გადაწყვეტილებით, მე აღარ ვარ არხის საინფორმაციო სამსახურის ხელმძღვანელი. ბუნებრივია, ისმის შეკითხვა _ პროფესიონალი, რომელიც 4 წლის განმავლობაში ქმნის არხის პოლტიკას "მოამბის" გუნდთან ერთად და ეს პოლიტიკა ყველა რეზოლუციაში, დასკვნაში ითვლება, როგორც ერთ-ერთი დაბალანსებული სამსახური, რატომ მიიღო არხის ხელმძღვანელმა ეს გადაწყვეტილება. ბუნებრივია, ამით მეც დავინტერესდი და ბარათაშვილს ვკითხე კიდეც, მაგრამ მას არგუმენტი არ აქვს", - განაცხადა ბერძენიშვილმა.
ბერძენიშვილი არხზე და მის ხელმძღვანელზე პოლიტიკურ ზეწოლაზე საუბრობს, უშუალოდ მის თანამდებობიდან გათავისუფლებას კი მაუწყებლის გუშინდელ ეთერში იუსტიციის მინისტრ თეა წულუკიანის განათლებასთან დაკავშირებით მომზადებულ რეპორტაჟს უკავშირებს.
"მე ველოდი, რომ ბარათაშვილი ამ გადაწყვეტილებას მიიღებდა, განსაკუთრებით გუშინდელი რეპორტაჟის შემდეგ, რომელიც იუსტიციის მინისტრის განათლებას შეეხებოდა. ბარათაშვილი რამდეჯერმე დამიკავშირდა და მთხოვა, რომ რეპორტაჟი არ გაკეთებულიყო, თუმცა რატომ არ უნდა გასულიყო ეთერში, პასუხი არ ჰქონდა. ამან დააჩქარა ის პროცესი, რაც ჩემთან დაკავშირებით ბოლო ერთ თვეში მიმდინარეობდა", - განაცხადა ბერძენიშვილმა და დასძინა, - "მისი სურვილი იყო, რომ კახეთში მომხდარი სტიქიის შედეგად დაზარალებულთა კომპენსაციის თემა და პრემიერის ბრიფინგები, ასევე, რამდენიმე სხვადასხვა საკითხი, რომელიც ახალი ხელისუფლების ქმედებებს უკავშირდება, მხოლოდ პოზიტიურ კონტექსტში განხილულიყო. რა თქმა უნდა, ამაზე ჩვენ ვერ შევთანხმდებოდით, რადგან ეს არაა კერძო ტელევიზია და არის საზოგადოებრივი მაუწყებელი".
ბერძენიშვილის განცხადებით, იგი მიმართავს საზოგადოებრივი მაუწყებლის ბორდს და აღნიშნულით დაინტერესებისკენ მოუწოდებს. მისივე თქმით, იქამდე, ვიდრე მომხდარზე ბორდი გადაწყვეტილებას არ დადებს, თანამდებობის დატოვებას არ აპირებს.
"მინდა სამეურვეო საბჭოს მივმართო, დაინტერესდეს რა პოლიტიკური ზეწოლის ქვეშ შეიძლება იყოს არხის გენერალური დირექტორი, როცა ამბობს, რომ საინფორმაციო პოლიტიკის გამო მას აქვს პრობლემები. მინდა ასევე მივმართო ყველა საერთაშორისო ორგანიზაციას, რომლებიც წლების განმავლობაში ჩართული არიან მაუწყებლის განვითარების პროცესში _ ჩაერთონ და გამოიკვლიონ, რასთან შეიძლება გვქონდეს საქმე. მე არსად წასვლას არ ვაპირებ. მინდა "მოამბის" მთელ კოლექტივს ვთხოვო, მშვიდად განვაგრძოთ მუშაობა, არსად არ მივდივარ სამეთვალყურეო საბჭოს გადაწყვეტილების მიღებამდე", - დასძინა ბერძენიშვილმა.