„ქრისტიან-დემოკრატიული მოძრაობის" ერთ-ერთი ლიდერი მაგდა ანიკაშვილი შინაგან საქმეთა მინისტრის, ირაკლი ღარიბაშვილის ინიციატივას ეხმაურება.
„მივესალმებით შსს მინისტრის ინიციატივას მრავალშვილიანი და ახლად შექმნილი ოჯახების ფულადი პრემიებით წახალისების შესახებ, თუმცა მიგვაჩნია, რომ მსგავსი პოლიტიკა ყველა საჯარო მოსამსახურეზე უნდა გავრცელდეს. მრავალშვილიანი და ახალგაზრდა ოჯახებისთვის სოციალური გარანტიების შექმნა მმართველი კოალიციის ერთ-ერთი წინასაარჩევნო დაპირება იყო და საზოგადოება ამ დაპირების შესრულებას ელოდება. სახელმწიფოს პოლიტიკა დემოგრაფიული და სოციალური დაცვის კუთხით უნდა იყოს უფრო აქტიური. ნამდვილად არ არის სასურველი საჯარო სამსახურებს შორის გარკვეული სოციალური უთანასწორობის პრეცედენტის შექმნა. მრავალშვილიანები და ახლად დაქორწინებულები სხვა სამინისტროებში და საბიუჯეტო დაფინანსებაზე მყოფ სხვა დაწესებულებებშიც არიან და სახელმწიფოს მხრიდან მათი ფინანსური მხარდაჭერა ასევე მნიშვნელოვანია. იგეგემება ცვლილებები შრომის კოდექსში, რის განხილვასაც პარლამენტი მალე დაიწყებს და მოვუწოდებ ხელისუფლებას, მსგავსი გადაწყვეტილებები არა მხოლოდ რომელიმე ერთი მინისტრის ინიციატივა იყოს, არამედ ქვეყანაში საჯარო მოსამსახურეებისთვის სოციალური დაცვის გარანტიები საკანონმდებლო დონეზე არსებობდეს და სამომავლოდ კერძო სექტორზეც გავრცელდეს"-აცხდებს მაგდა ანიკაშვილი.