ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი დავით დარახველიძე და მინისტრის პირველი მოადგილე გოგი ფაცაცია თბილისის ზღვის ტერიტორიაზე, სასტუმრო „ოქროს საწმისსა" და „ქართლში" მცხოვრებ იძულებით გადაადგილებულ პირებს შეხვდნენ. დევნილებმა მინისტრს და მოადგილეს ის პრობლემები გააცნეს, რაც წლების მანძილზე აწუხებთ და დახმარების იმედი გამოთქვეს.
დევნილებს წლების განმავლობაში არაერთი პრობლემა დაუგროვდათ. დევნილებმა მინისტრთან შეხვედრაზე ერთ-ერთ მთავარ პრობლემად მძიმე საცხოვრებელი პირობები დაასახელეს. ასევე, მათი თხოვნაა, გაირკვეს, რა ბედი ელის აღნიშნულ შენობებს, რადგან მათ კერძო მფლობელი ჰყავთ. დევნილებს ასევე გააჩნიათ ელექტროენერგიის დავალიანება და მინისტრს სთხოვეს დახმარება შენობის გამრიცხველიანებასთან დაკავშირებით.
მინისტრმა დევნილებთან საუბრისას აღნიშნა, რომ დევნილთა სამინისტრომ „თელასს" შენობის ინდივიდუალურ გამრიცხველიანებასთან დაკავშირებით შუამდგომლობის წერილი უკვე გაუგზავნა.
„აქ მაცხოვრებელ დევნილებს უამრავი პრობლემა აქვთ. თბილისის ზღვის დასახლებაში 3 000-მდე დევნილი ცხოვრობს და ყველა აქვს გათბობის პრობლემა, სახურავიდან ჩამოდის წყალი, მოხსნილი აქვთ შეღავათები ელექტროენერგიაზე და ეს თემა გადადახედია. დევნილებს ასევე აინტერესებთ რა იქნება სამომავლოდ. ვისაუბრეთ გულწრფელად საკმაოდ მძიმე მდგომარეობაში არიან და ჩვენ ვიზრუნებთ, რომ მათი პრობლემები მაქსიმალურად მოვაგვაროთ" - აღნიშნა დავით დარახველიძემ
დევნილების თქმით, მათთვის საკმაოდ მნიშვნელოვანია, რომ მინისტრი ხალხს უსმენს, მათი პრობლემებით ინტერესდება და დევნილებს ნდობა დაუბრუნდათ. „20 წელია, არავის გავხსენებივართ. გაგვიკვირდა, რომ მინისტრი გვესტუმრა. ჩვენი პრობლემებით დაინტერესდა, ყველას მოგვისმინა, ჩვენი პრობლემებით შეწუხდა და დარწმუნებული ვართ, ჩვენს დასახმარებლად ყველაფერს გააკეთებს. წარმოიდგინეთ, გვიხარია, რომ სამინისტრო გაიხსნა და ნდობა გაგვიჩნდა" - აღნიშნა აფხაზეთიდან დევნილმა ლიანა კუპრეიშვილმა.
მინისტრი და სამინისტროს წარმომადგენლები ერთ-ერთი დევნილის ოჯახში სამძიმარზეც მივიდნენ და ქალბატონ დალი კაჭარავას დედის გარდაცვალების გამო სამძიმარი გამოუცხადეს.
დავით დარახველიძე დევნილ მოსახლეობასთან შეხვედრას ყოველდღიურ რეჟიმში აგრძელებს. მინისტრი დევნილებს ხვდება როგორც კომპაქტური ჩასახლების ობიექტებში, ისე სამინისტროში - მიღების დღეებზე.
