ევგენი მიქელაძის სახელობის ეროვნული მუსიკალური ცენტრი 9 თებერვალს მსოფლიოს ერთ-ერთ საუკეთესო ალტისტს მაქსიმ რისანოვს უმასპინძლებს. უკრაინელი მუსიკოსი უკვე მესამედ სტუმრობს თბილისს და ამჯერად, იგი მსმენელის წინაშე არა მხოლოდ სოლისტის - არამედ დირიჟორის ამპლუაშიც წარსდგება. სახელმწიფო სიმფონიურ ორკესტრთან ერთად, მაქსიმ რისანოვი მოცარტის, ტელემანის და ახალგაზრდა კომპოზიტორის - დობრინკა ტაბაკოვას ნაწარმოებებს შეასრულებს.
მაქსიმ რისანოვი პირველად ქართველ პუბლიკას გია ყანჩელმა წარუდგინა, დიდი ქართველი კომპოზიტორის ინიციატივით რისანოვმა ნიკოლოზ რაჭველთან, საქართველოს სახელმწიფო კაპელასთან და ორკესტრთან ერთად, მისივე საიუბილეო საღამოზე ოპერის თეატრში `სტიქსი~ შეასრულა.
მაქსიმ რისანოვი განაგრძობს შემოქმედებით ურთიერთობას ნიკოლოზ რაჭველთან და სახელმწიფო სიმფონიურ ორკესტრთან, მან ქართველ მეგობრებთან ერთად 2011 წლის ნოემბერში გამართა კონცერტი და 9 თებერვალს იგი კვლავ დაუკრავს ქართველი მსმენელისთვის.
რისანოვი უკრავს უნიკალურ ინსტრუმენტზე _ ლეგენდარული ჯოვანი ბატისტა გვადანინის მიერ 1780 წელს დამზადებულ ალტზე, რომელიც მას გადასცა ელისე მატილდეს ფონდმა.
