საქართველო ესპანეთში, ქალაქ მადრიდში მიმდინარე საერთაშორისო ტურიზმის გამოფენა-ბაზრობაში „FITUR 2013"-ში იღებს მონაწილეობას. როგორც სააგენტო „ჯი-ეიჩ-ენს" ტურიზმის ეროვნული ადმინისტრაციიდან აცნობეს, აღნიშნული გამოფენა ერთ-ერთი ყველაზე მაშტაბურია მსოფლიოში, მასში 10 644 კომპანია მონაწილეობს 166 ქვეყნიდან, 7 532 ჟურნალისტი ესწრება და საშუალოდ 124 700-მდე ვიზიტორი სტუმრობს.
საქართველოს სტენდზე ტურიზმის ეროვნულ ადმინისტრაციასთან ერთად, მონაწილეობას მიიღებენ შემდეგი კომპანიები: Caucasus Travel, Visit Georgia, Georgian Discovery Tours, Georgica Travel, Explore Georgia, და საქართველოს დაცული ტერიტორიების სააგენტო.
სტატისტიკური მონაცემების თანახმად, 2011 წლიდან 2012 წლამდე ესპანეთიდან დაფიქსირდა ტურისტების 12%-იანი ზრდა.
FITOUR 2013-ის ფარგლებში 2-5 თებერვალს, გაეროს მსოფლიო ტურიზმის ორგანიზაციის (UN WTO) გენერალური მდივნის ტალიბ რიფაის მიწვევით მადრიდში გაემგზავრება ეკონომიკისა და მდგრადი განვითარების მინისტრის პირველი მოადგილე დიმიტრი ქუმსიშვილი. ვიზიტის ფარგლებში ის შეხვდება გენერალურ მდივანს, სადაც განიხილება მომავალი თანამშრომლობის გეგმები და ახალი პროექტები.
ვიზიტის ფარგლებში, დიმიტრი ქუმსიშვილი სხვადასხვა ქვეყნის მაღალი რანგის ოფიციალურ პირებთან შეხვედრებს გამართავს.