დედაქალაქის მერია მიკროავტობუსის მძღოლებსა და "თბილისის მიკროავტობუსის" წარმომადგენლებს მოლაპარაკებების განახლებისკენ მოუწოდებს.
თბილისის ტრანსპორტის სამსახურის ხელმძღვანელის აკაკი ჯოხაძის განცხადებით, მერია მხარეებს შორის მედიატორის ფუნქციის შესრულებას განაგრძობს და გამოთქვამს მზადყოფნას, რომ მოლაპარაკებები ხვალვე განახლდეს.
ჯოხაძის განცხადებით, მიკროავტობუსების მძღოლების გაფიცვა თბილისის მოსახლეობას მნიშვნელოვან დისკომფორტს უქმნის.
"მთავარი მიზანი არსებული დავის განხილვის კაბინეტურ რეჟიმში გადაყვანა და გაფიცვის შეწყვეტაა. მერია კერძო კომპანიის ფინანსური გადაწყვეტილებების მიღებაში ვერ ჩაერევა, თუმცა, მოლაპარაკებების გზით ყველა ბერკეტს გამოიყენებს, რათა კრიზისი დროულად აღმოიფხვრას", - განაცხადა კოხაძემ
შეგახსენებთ, რომ კომპანია "თბილისის მიკროავტობუსსა" და გაფიცულ მძღოლებს შორის დღეს გამართული მოლაპარაკებებიც უშედეგოდ დასრულდა. მიკროავტობუსების მძღოლების გაფიცვა მეხუთე დღეა მიმდინარეობს.
