რუსეთის მთავარმა სანიტარმა გენადი ონიშენკომ მოსკოვში გამართულ პრესკონფერენციაზე განაცხადა, რომ ვერანაირ დაბრკოლებას ვეღარ ხედავს საიმისოდ, რომ ქართული ღვინო რუსეთის ბაზარზე დაბრუნდეს. ერთადერთი პრობლემა, რომელიც ონიშენკოს აზრით ამ საკითხს ახლავს, არის ის, რომ ამ საკითხის პოლიტიზირება ხდება.
„რაც შეეხება ჩემს პოზიციას, მე განსაკუთრებულ პრობლემებს ვერ ვხედავ, თუ თემა არ გაპოლიტიზირდება. შევნიშნავ, რომ ქართულმა ღვინის წარმოებამ ამ წლებში დიდი ნაბიჯი გადადგა წინ" - ციტირებს ონიშენკოს ნათქვამს „ინტერფაქსი".
ონიშენკოს განცხადებით, 4 თებერვალს მოსკოვში ქართულ დელეგაციასთან შეხვედრა შედგება, რის შემდეგაც რუსული მხარის წარმომადგენლები საქართველოში ჩავლენ. „ჩვენი სპეციალისტები ადგილზე შეამოწმებენ, რა ხდება იქ სინამდვილეში", - აღნიშნა ონიშენკომ.
როგორც ცნობილია, რუსეთში ქართული ღვინის შეტანა 2006 წელს რუსეთის ინიციატივით აიკრძალა. 2012 წლის ოქტომბერში საქართველოს ახალი ხელისუფლება რუსეთთან ეკონომიკური ურთიერთობის აღდგენის ინიციატივით გამოვიდა. გენადი ონიშენკოს განცხადებით, რუსეთის ბაზარზე უხარისხო ღვინის შეტანის აკრძალვამ, ქართული ღვინის წარმოებაზე კეთილისმყოფელი გავლენა მოახდინა და მისი ხარისხი ამ წლებში მნიშვნელოვნად გაუმჯობესდა. ონიშენკო იმედს გამოთქვამს, რომ თემა არ გახდება სპეკულაციების საგანი.