სამედიცინო ცენტრი "მრჩეველი" - ლიმბახის დიაგნოსტიკის ევროპული ჯგუფი ახორციელებს სიმსივნის მარკერების ლაბორატორიულ კვლევებს ლიმბახის სათავო ლაბორატორიაში (ჰაიდელბერგი, გერმანია).

შეგახსენებთ, რომ 4 თებერვალი კიბოსთან ბრძოლის საერთაშორისო დღეა.

დაავადებათა კონტროლისა და საზოგადოებრივი ჯანმრთელობის ეროვნული ცენტრის მონაცემებით, საქართველოში ბოლო წლებში 58000-მდე ადამიანია დაავადებული სიმსივნით, ბოლო 10 წლის განმავლობაში კი სიმსივნით დაავადებულთა რიცხვმა 22%-ით იმატა (www.ncdc.ge).

ავთვისებიან წარმონაქმთა შორის განსაკუთრებით მაღალი სიხშირით მამაკაცებში ტრაქეის, ბრონქებისა და ფილტვის კიბო, ქალებში კი სარძევე ჯირკვლისა და საშვილოსნოს ყელის კიბო გამოირჩევა. ამ სახის სიმსივნეებით მსოფლიოში ყოველწლიურად 2 მილიონამდე ადამიანი იღუპება. ასევე საკმაოდ გავრცელებულია კუჭის, საყლაპავის, პანკრეასის, სწორი ნაწლავის, კანისა და ფარისებრი ჯირკვლის ავთვისებიანი სიმსივნეები.

კიბოს კვლევის საერთაშორისო სააგენტოს მონაცემებით, საქართველოში სხვადასხვა ორგანოს სიმსივნე რიგით მეორე ადგილზეა სიკვდილის გამომწვევ დაავადებათა შორის.

ლაბორატორიული კვლევებისა და დიაგნოსტიკური საშუალებების განვითარებასთან ერთად, იზრდება კიბოს ადრეულ სტადიაზე აღმოჩენის შესაძლებლობები, რაც წარმატებული მკურნალობისა და გამოჯანმრთელების შანსს მნიშვნელოვნად ზრდის.