დღეს, 28 იანვარს, დაიწყო ფინანსთა მინისტრის, ნოდარ ხადურის სამუშო ვიზიტი ამერიკის შეერთებულ შტატებში. მინისტრთან ერთად აშშ-ში გაემგზავრა მინისტრის მოადგილე დავით ლეჟავა.
ფინანსთა სამინისტროს ინფორმაციით, ვიზიტის ფარგლებში დაგეგმილია ნოდარ ხადურის შეხვედრები აშშ-სსახელმწიფო დეპარტამენტში,აშშ-ს სახაზინო დეპარტამენტში, ათასწლეულის გამოწვევის კორპორაციაში, საერთაშორისო სავალუტო ფონდში, მსოფლიო ბანკში. შეხვედრაზე მხარეები იმსჯელებენ აშშ-სა და საერთაშორისო საფინანსო ინსტიტუტების ფინანსური მხარდაჭერით განხორციელებული პროექტების მიმდინარეობაზე, განიხილავენ სამომავლო პერსპექტივას თანამშრომლობის გაუმჯობესების მიმართულებით.
ვიზიტის ფარგლებში ფინანსთა მინისტრი მოლაპარაკებებს გამართავს ოპიკში (OPIC), ამერიკის ექსპორტ-იმპორტის ბანკში. საქართველოს საინვესტიციო პოტენციალზე ისაუბრებენ ინვესტორებთან დაგეგმილი შეხვედრებისას. ნოდარ ხადური ასევე ისაუბრებს ქვეყნის ეკონომიკაში არსებულ მდგომარეობაზე და სამთავრობო პროგრამით გათვალისწინებულ რეფორმებზე.
ფინანსთა მინისტრის სამუშაო ვიზიტი ამერიკის შეერთებულ შტატებში 4 თებერვალს დასრულდება.