საქართველოს რეგიონული განვითარების სამინისტროსა და გაეროს განვითარების ფონდის ორგანიზებით, ბაზალეთის სასტუმრო კომპლექსში სემინარი თემაზე - „რეგიონული განვითარების დაგეგმარება" მიმდინარეობს.
სემინარს მინისტრი დავით ნარმანია, მინისტრის პირველი მოადგილე თენგიზ შერგელაშვილი, გაეროს განვითარების ფონდის (UNDP) მუდმივი წარმომადგენლის მოადგილე ინიტა პაულოვიცა და სხვა საერთაშორისო ორგანიზაციების წარმომადგენლები ესწრებიან.
სემინარზე განიხილება საქართველოს რეგიონული განვითარების სისტემა, რეგიონული განვითარების 2010-2017 წლების სახელმწიფო სტრატეგია, ევროკავშირის მიდგომა რეგიონული განვითარების მართვასთან, სტრატეგიის გახორციელებასთან დაკავშირებული ფინანსური დახმარებები და სხვა საკითხები. კონფერენციის მონაწილეები, ასევე, მსჯელობენ რეგიონული განვითარების სტრატეგიის სამოქმედო გეგმის შესახებ.
,,ძალიან მნიშვნელოვან თემაზე შევიკრიბეთ, ეს არის რეგიონული განვითარება, რომლის მთავარი მიზანია რეგიონებს შორის უთანასწორობის აღმოფხვრა და იქ მცხოვრები მოქალაქეებისთვის სარგებლის მოტანა. რეგიონული განვითარების კუთხით უკვე გვაქვს სახელმწიფო სტრატეგია და დღეს შევიკრიბეთ რათა გადავწყვიტოთ თუ რა უნდა იყოს კონკრეტული პრიორიტეტი და რა კუთხით გავაგრძელოთ მუშაობა. მიგვაჩნია რომ ამ საქმეში საერთაშორისო საზოგადოებამ თავისი წვლილი უნდა შეიტანოს და გაეროს პროგრამის მთავარი მიზანია აღნიშნულის მიღწევაში დაგეხმაროთ", -განაცხადა საქართველოში გაეროს განვითარების ფონდის (UNDP) მუდმივი წარმომადგენლის მოადგილემ ინიტა პაულოვიცმა.
