სარფის საბაჟო-გამშვებ პუნქტში, აჭარის საპატრულო პოლიციის თანამშრომლებმა, განსაკუთრებით დიდი ოდენობის „ჰეროინის" შემოტანის ფაქტზე, 1981 წელს დაბადებული გიორგი ჯ. დააკავეს.
დაკავებულს, შემოწმებისას, ქურთუკის ჯიბეში, პოლიეთილენის პარკში შეფუთული ნარკოტიკული საშუალება აღმოაჩნდა.
ექსპერტიზამ დაადგინა, რომ გიორგი ჯ-მ თურქეთის რესპუბლიკიდან კუსტარულად დამზადებული და 23 პაკეტად დაფასოებული, 10, 45 გრამი, „ჰეროინის" შემცველი ნარკოტიკული საშუალების საქართველოში შემოტანა სცადა. ასევე ექსპერტიზის დასკვნით, აღმოჩენილ ნარკოტიკულ საშუალებაში „ჰეროინის" სუფთა წონა 4,485 გრამია, რაც მოქმედი კანონმდებლობით, განსაკუთრებით დიდ ოდენობად ითვლება.
ნარკოლოგიური შემოწმების შედეგად, დაკავებულს ორგანიზმში ოპიუმის ჯგუფის ნარკოტიკის მოხმარების კვალი აღმოაჩნდა. სისხლის სამართლის საქმე 260-ე მუხლის (ნარკოტიკული ნივთიერების განსაკუთრებით დიდი ოდენობით შეძენა, შენახვა) მე-3 ნაწილითა და 262-ე მუხლის (ნარკოტიკული საშუალების უკანონო შემოტანა) მე-4 ნაწილით მიმდინარეობს. დაკავებული დროებით მოთავსების იზოლატორშია გადაყვანილი.