ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ აშშ-ს საერთაშორისო განვითარების სააგენტოს (USAID) ხელმძღვანელთან სტივენ ჰეიკენთან და სააგენტოს წარმომადგენელთან ბრედ ქარისთან სამუშაო შეხვედრა გამართა. მხარეებმა დევნილებისთვის საცხოვრებელი ბინების მშენებლობები და რეაბილიტაციის საკითები განიხილეს.
ძირითადად ისაუბრეს რეგიონებში მიმდინარე და დაგეგმილ მშენებლობებზე. ასევე ინფრასტრუქტურულ პროექტებზე. როგორც USAID-ის ხელმძღვანელმა სტივენ ჰეიკენმა აღნიშნა, მას შემდეგ, რაც დაგეგმილი პროექტები ამოიწურება, თანამშრომლობა სოციალურ-ეკონომიკური მიმართულებით გაგრძელდება.
დავით დარახველიძემ კი აღნიშნა, რომ მიმდინარე წლის გეგმა საკმაოდ დატვირთულია: „დეტალურად გავიარეთ 2013 წლის სამუშაო გეგმა, რომელიც საკმაოდ დატვირთული და საინტერესოა. განვიხილეთ დევნილთა განსახლების საკითხები, მიმდინარე სამუშაოები, შენობების რეაბილიტაცია. ასევე ვისაუბრეთ წყლის სისტემის მოწესრიგებაზე. მიმდინარე წელს მშენებლობებისა და რეაბილიტაციის მხრივ 26 მილიონიანი დაფინანსების ძირითადი ნაწილი დაიხარჯება, დარჩენილი ნაწილი კი მომავალ წელს გაგრძელდება. ამის შემდგომ რა იქნება, ამ ეტაპისთვის გაურკვეველია."
შეგახსენებთ, რომ აშშ-ს საერთაშორისო განვითარების სააგენტო დევნილებისთვის განხორციელებული პროექტების ერთ-ერთი მსხვილი მხარდამჭერია.
